ԵՐԵՎԱՆ, 9 հուլիսի–Sputnik. Հայաստանի սահմանամերձ Ոսկևան և Բագրատաշեն համայնքներում երկու նորակառույց ամբուլատորիաներ են բացվել, հաղորդում է ՀՀ առողջապահության նախարարության մամուլի ծառայությունը։
Ինչպես նշվում է հաղորդագրության մեջ, ՀՀ կառավարության և Համաշխարհային բանկի ֆինանսավորմամբ իրականացվող վարկային ծրագրի շրջանակում կառուցված ամբուլատորիաների բացմանը ներկա էին ՀՀ առողջապահության նախարար Արմեն Մուրադյանը և Տավուշի մարզպետ Հովիկ Աբովյանը:
Ամբուլատորիաների բուժանձնակազմի հետ զրույցի ժամանակ ՀՀ առողջապահության նախարար Արմեն Մուրադյանը հետաքրքրվել է, թե ինչպես է իրականացվում Իմունականխարգելման ազգային ծրագիրը, պատվաստումների որքան ծածկույթ է ապահովվում, բնակչությանն ինչպես են հասցվում անվճար հատկացվող դեղերը:
«Քայլեր են իրականացվում սահմանամերձ համայնքներում բուժօգնությունը որակյալ և հասանելի դարձնելու ուղղությամբ, ինչը կնպաստի մարզերում առողջապահական համակարգի զարգացմանը և բնակչության շրջանում վստահության ձևավորմանը», – նշել է Մուրադյանը։
Նախարարն անդրադարձել է նաև 2015թ. մեկնարկած նոր ծրագրերին, մասնավորապես` սոցիալական փաթեթի շահառուների համար ներդրված կանխարգելիչ բժշկական զննությանը, ինչպես նաև «Հիվանդությունների կանխարգելում և վերահսկում» ծրագրի շրջանակում 2015 թվականի սկզբից իրականցվող սկրինինգային ծրագրերին` կարևորելով դրանց արդյունավետ իրականացումը մարզերում:
Ըստ հաղորդագրության` 2007-2008թթ. Լոս Անջելեսի բժիշկների միության աջակցությամբ սկսվել էին Ոսկեվանի առողջության առաջնային պահպանման կենտրոնի նոր շենքի կառուցման աշխատանքները, որոնք 2011թվականից դադարեցվել էին: Վերանորոգման աշխատանքներ կատարելը աննպատակահարմար էր, ուստի որոշվեց հատկացված տարածքում կառուցել ԱԱՊԿ-ի նոր շենք: Նոր շենքի շինարարական աշխատանքները սկսվել էին 2014թ. նոյեմբերին: Ընդհանուր առմամբ, Ոսկեվան համայնքում ներդրվել է շուրջ 57,3 մլն ՀՀ դրամ։
Բագրատաշենի առողջության առաջնային պահպանման կենտրոնի շինարարական աշխատանքները սկսվել են 2014 թվականի ապրիլին: Ընդհանուր առմամբ, Բագրատաշեն համայնքում ներդրվել է շուրջ 53.3 մլն ՀՀ դրամ:
ՀՀ առողջապահության նախարարության կողմից ամբուլատորիաներին փոխանցվեցին մարդասիրական օգնությամբ ստացված դեղեր և բժշկական պարագաներ:
Հայաստանի սահմանամերձ համայնքներում բացվել է երկու նորակառույց ամբուլատորիա
© Sputnik / Игорь Зарембо
/ Բաժանորդագրվել
ՀՀ առողջապահության նախարարության կողմից ամբուլատորիաներին փոխանցվել են մարդասիրական օգնությամբ ստացված դեղեր և բժշկական պարագաներ:
