Ամենայն Հայոց Կաթողիկոսը. Սփյուռքահայ ուսուցիչների վերապատրաստման դասընթացներն ընդլայնվում են

ԵՐԵՎԱՆ, 15 հուլիսի–Sputnik. Ն. Ս.Օ.Տ.Տ Գարեգին Բ Ծայրագույն Պատրիարք և Ամենայն Հայոց Կաթողիկոսը նախօրեին Մայր Աթոռ Սուրբ Էջմիածնի «Վաչե և Թամար Մանուկյան» մատենադարանում հանդիպում է  ունեցել Հայաստանում վերապատրաստման դասընթացներին մասնակցող սփյուռքահայ 62 ուսուցիչների հետ, հաղորդում է Մայր Աթոռ Սուրբ Էջմիածնի տեղեկատվական համակարգը։

Ըստ հաղորդագրության` հանդիպման սկզբում Քրիստոնեական դաստիարակության կենտրոնի տնօրեն Գերաշնորհ Տ. Վարդան եպիսկոպոս Նավասարդյանը ողջունել և բարի գալուստ է մաղթել 14 երկրների հայկական կրթական հաստատությունները ներկայացնող ուսուցիչներին։

Նավասարդյանը հույս է հայտնել, որ Ամենայն Հայոց Հայրապետի օրհնությամբ ուսուցիչները նոր լիցքերով կշարունակեն ուսուցչի վեհ առաքելությունը։

Հանդիպման ընթացքում հայագիտական առարկաներ դասավանդող սփյուռքահայ ուսուցիչներին իր օրհնությունն ու պատգամն է բերել Գարեգին Բ Ամենայն Հայոց Կաթողիկոսը։

«Նորին Սրբությունն ուրախություն է հայտնել, որ Հայաստանում սփյուռքահայ ուսուցիչների վերապատրաստման դասընթացները շարունակվում են և ավելի մեծ թվով ուսուցիչներ են մասնակցում դրանց», – նշվում է տեղեկատվական համակարգի հաղորդագրության մեջ։

Ըստ հաղորդագրության` Վեհափառ Հայրապետը վերհիշել է, որ առաջին տարիներին վերապատրաստման դասընթացները կազմակերպվում էին Մայր Աթոռ Ս. Էջմիածնում ՀՀ Կրթության և գիտության նախարարության հետ համատեղ։

«Իմ սպասումն է, որ ուսուցիչները հայագիտական առարկաներ դասավանդելուց զատ երիտասարդ սերնդին հաղորդ դարձնեն նաև ազգային, հայրենական և համայնքային կյանքի իրողություններին, նրանց առիթ ընձեռեն ներգրավվելու տարբեր ծրագրերում և այդպիսով մասնակից դառնալու ազգային կյանքին», – նշել է Ամենայն Հայոց Կաթողիկոսը։

Ամենայն Հայոց Կաթողիկոսը հավելել է, որ միայն Հայրենիքի նկատմամբ սեր, ապագայի հանդեպ հավատք և տեսիլք ունեցող անհատը կարող է հաղթահարել կյանքի բոլոր դժվարությունները:

Նա նաև վստահություն է հայտնել, որ ուսուցիչները դասընթացի ավարտին իրենց երկրները կվերադառնան ոչ միայն նոր գիտելիքներով և փորձառությամբ, այլև` հոգևոր-ազգային ապրումներով խանդավառված և ներշնչված ազատ ու անկախ Հայրենիքի իրողությամբ:

Հանդիպման ավարտին Ամենայն Հայոց Կաթողիկոսն արդյունավոր ընթացք է ցանկացել դասընթացներին` մաղթելով, որ «Բարին Աստված ուսուցիչներին զորացնի իրենց կարևոր առաքելության մեջ»։