Սևանա լճի հատակում հայտնաբերվել են եզակի հնագիտական նմուշներ

ԵՐԵՎԱՆ, հուլիսի 24– Sputnik.  Սևանի ավազանի ստորջրյա ուսուսմնասիրության հայ–ֆրանսիական գիտարշավի անդամները եզակի հնագիտական գտածոներ են հայտնաբերել Սևանա լճի հատակում, ուրբաթ մամուլի ասուլիսում հաղորդեց գիտարշավի մասնակից, Ստորջրյա հետազոտությունների և սուզումների հայկական կենտրոնի անդամ Վահե Մելքումյանը։

«Հունիսի 15-23–ը ստորջրյա գիտարշավի ժամանակ ավելի քան 8 մետր խորության վրա մենք նկատել ենք հետաքրքիր քարացած հնագիտական իր։ Արդյունքում պարզվել է, որ դա ուղտի գանգ է։ Հետաքրքիր է այն, որ Սևանի հատակում նման գտածո ենք գտել նաև նախորդ գիտարշավներից մեկի ժամանակ»,– նշեց Մելքումյանը։

Նրա խոսքով` գիտարշավի մասնակիցները գանգը հանձնել են փորձագետներին, որպեսզի դրա մասին ավելի մանրամասն տեղեկատվություն ստանան։

«Բացի այդ, լճի հատակին 18 մետր խորության վրա մենք գտել ենք ևս մեկ հնագիտական գտածո` հին քարե թաս, որը մեծ հետաքրքրություն է առաջացրել։ Այդ ցուցանմուշը նույնպես հանձնվել է գիտնականներին հետազոտությունների համար»,– ասաց Մելքումյանը։

Սևանա ալիճը Հայաստանի տարածքում և տարածաշրջանում քաղցրահամ ջրի միակ խոշոր աղբյուրն է, որը գտնվում է Հայկական լեռնաշխարհի սրտում` 1914 մետր բարձրության վրա։

Դա Եվրոպայում և Ասիայում ամենամեծ բարձր լեռնային լճերից է։ Լճի երկարությունը կազմում է ավելի քան 70 կմ, ջրի մակերեսը` գրեթե 1,5 հազար քկմ։