ԵՐԵՎԱՆ, 28 հուլիսի–Sputnik. Վրաց-ռուսական սահմանի Դարիալի անցակետի աշխատանքը կերկարացվի ևս 3,5 ժամով, այսինքն՝ վերջին մեկ ամսվա ընթացքում 6.5 ժամով, և նոր պայմանավորվածության համաձայն` անցակետը կգործի ժամը 05.30–ից մինչև 24.00-ն, նման պայմանավորվածություն է ձեռք բերվել ՀՀ վարչապետ Հովիկ Աբրահամյանի և Վրաստանի վարչապետ Իրակլի Ղարիբաշվիլու հանդիպման ընթացքում, որը տեղի է ունեցել ՀՀ վարչապետի` Վրաստան կատարած աշխատանքային այցի շրջանակում, հաղորդում է ՀՀ կառավարության մամուլի ծառայությունը։
Ըստ հաղորդագրության` երկու երկրների վարչապետերը նախօրեին այցելել են վրաց-ռուսական սահմանին տեղակայված Դարիալի (Կազբեկի) սահմանանային անցակետ:
Երկու երկրների կառավարության ղեկավարները տեղում ծանոթացել են սահմանային անցակետի աշխատանքներին, զրուցել աշխատակիցների հետ:
«Վարչապետ Հովիկ Աբրահամյանին, մասնավորապես, հետաքրքրել է, թե ինչ խնդիրներ են ունենում Վրաստանի տարածքով Հայաստանից Ռուսաստան մեկնող մեքենաները, որքան ժամանակ է անհրաժեշտ փաստաթղթերը զննելու ու համապատասխան ընթացակարգերն անցնելու համար», – նշվում է հաղորդագրության մեջ։
Վարչապետ Աբրահամյանը զրուցել է նաև անցակետով Ռուսաստանի Դաշնություն մեկնող Հայաստանի քաղաքացիների հետ:
Ըստ հաղորդագրության` կողմերը քննարկել են վրացական անցակետում հայկական բեռնատարների խցանումները նվազագույնի հասցնելու, ինչպես նաև՝ Հայաստանից վրացական անցակետով կազմակերպվող արտահանումների գործընթացը դյուրացնելու հետ կապված մի շարք հարցեր:
«Անդրադարձ է կատարվել նաև հայ-վրացական սահմանին կառուցվելիք «Բարեկամության» կամրջի շինարարության հարցին», – նշվում է հաղորդագրության մեջ։
Կողմերը պայմանավորվել են արագ ժամկետներում սկսել կառուցման գործընթացը:
Երկու երկրների վարչապետների քննարկման օրակարգում էր նաև Վրաստանը Ռուաստանին կապող մայրուղու այն հատվածների հարցը, որտեղ մշտապես սողանքների, քարաթափման վտանգ կա:
«Վրացական կողմը տեղեկացրել է, որ նախատեսում է քայլեր ձեռնարկել ճանապարհահատվածն առավել անվտանգ դարձնելու ուղղությամբ», – նշվում է կառավարության մամուլի ծառայության հաղորդագրության մեջ։
Այդ նպատակով, մասնավորապես, նախատեսվում է իրականացնել ճանապարհի լայնացման, ինչպես նաև լուսավորման հետ կապված աշխատանքներ:
Վրաց-ռուսական սահմանի Դարիալի անցակետի աշխատանքը կերկարացվի ևս 3,5 ժամով
Բաժանորդագրվել
Նոր պայմանավորվածության համաձայն` Դարիալի անցակետը կգործի ժամը 05.30–ից մինչև 24.00-ն:
