04:04 24 հոկտեմբերի 2017
Ուղիղ եթեր
Больница

Փորձագետ. Հայաստանում А և B տեսակի հեպատիտով հիվանդացության մակարդակը նվազում է

© Страница Министерства здравоохранения Армении в Facebook
Հայաստան
Ստանալ կարճ հղումը
16 0 0

Հայաստանում А հեպատիտով հիվանդացության մակարդակը վերջին տարիներին նվազել է 11 անգամ, հայտնեց ՀՀ ԱՆ հիվանդությունների վերահսկման և կանխարգելման ազգային կենտրոնի ներկայացուցիչ Ռոմելլա Աբովյանը։

ԵՐԵՎԱՆ, 28 հուլիսի-Sputnik. Հայաստանում А և B տեսակի հեպատիտով հիվանդացության մակարդակի նվազման միտում է նկատվում, երեքշաբթի ասաց ՀՀ ԱՆ հիվանդությունների վերահսկման և կանխարգելման ազգային կենտրոնի ոչ վարակիչ հիվանդությունների և ներհիվանդանոցային վարակների համաճարակաբանության բաժնի պետ Ռոմելլա Աբովյանը։

«Այդ սուր վիրուսային հիվանդությամբ վարակների դեպքերի մոտ կեսը բաժին է ընկնում հեպատիտ A–ին։ Հակահամաճարակաբանական և կանխարգելիչ միջոցառումների շնորհիվ վերջին տարիներին հեպատիտ A–ով հիվանդացության մակարդակը մեր երկրում նվազել է 11 անգամ»,– ավելացրեց Աբովյանը Հեպատիտի դեմ պայքարի միջազգային օրվան նվիրված մամուլի ասուլիսում։

Նա հայտնեց, որ 2014 թվականի տվյալով` A հեպատիտով հիվանդացության մակարդակը հանրապետությունում կազմել է 2.4 դեպք հանրապետության 100 հազար բնակիչների հաշվարկով` 2008 թվականի 25.7 դեպքի դիմաց։ B հեպատիտի մասով 2014 թվականին գրանցվել է 1.8 դեպք 100 հազար մարդու հաշվարկով` 2008 թվականի 3.4 դեպքի դիմաց։

Աբովյանն ընդգծեց, որ հեպատիտով հիվանդացությունը մինչև 14 տարեկան երեխաների շրջանում 1999 թվականից հետո կրճատվել է 140 անգամ, ինչը կապված է ամբողջ երկրում այդ հիվանդության դեմ պատվաստման ծրագրի հետ։

Նա միաժամանակ ավելացրեց, որ հեպատիտ C–ն ինչպես Հայաստանում, այնպես էլ ամբողջ աշխարհում շարունակում է հիմնական խնդիր մնալ, եթե հաշվի առնենք հեպատիտի այդ տեսակի հիվանդացության աճի միտումը։

Հեպատիտի դեմ պայքարի միջազգային օրը (World Hepatitis Day) նշվում է հուլիսի 28–ին Հեպատիտի դեմ պայքարի համաշխարհային դաշինքի (World Hepatitis Alliance, WHA)` Ժնևում (Շվեյցարիա) 2007 թվականի դեկտեմբերին գրանցված ոչ առևտրային կազմակերպության նախաձեռնությամբ։

Դաշինքում ներառված են 80 երկիր ներկայացնող 216 բժշկական կազմակերպություններ։ 2015 թվականին հեպատիտի դեմ պայքարի օրն անցկացվում է «Կանխեք վիրուսային հեպատիտը։ Գործեք անհապաղ» կարգախոսով։

Առողջապահության համաշխարհային կազմակերպության տվյալով` այսօր աշխարհում հեպատիտով վարակված մարդկանց թիվը կազմում է 600 միլիոն։

Գլխավոր թեմաներ