ԵՐԵՎԱՆ, 30 հուլիսի– Sputnik. ՄԱԿ–ի ԱԽ–ի` MH17 ինքնաթիռի ավիավթարի հարցով միջազգային դատարան ստեղծելու նախագծի վերաբերյալ որոշումը Ռուսաստան–Արևմուտք փոխհարաբերություններում առկա ճգնաժամի դրսևորման ձևերից մեկը դարձավ, «Sputnik–Արմենիա»–ին հայտարարեց Կովկասի ինստիտուտի տնօրեն Ալեքսանդր Իսկանդարյանը։
«Ինձ թվում է, որ այս քվեարկությունն իրավաբանական բաղկացուցիչ չուներ, այն ուներ քաղաքական բաղկացուցիչ։ Դրանով փորձ չէր արվում իսկապես ստեղծել միջազգային հանձնաժողով։ Բոլորին հասկանալի էր, որ դա անհնար է», – ասաց Իսկանդարյանը։
Ռուսաստանը նախօրեին արգելափակել է նախորդ տարվա հուլիսին Ուկրաինայի արևելքում «Մալայզիական ավիաուղիներ»–ին պատկանող ուղևորատար ինքնաթիռի վթարի համար մեղավորների նկատմամբ միջազգային դատարան ստեղծելու մասին բանաձևի նախագծի ընդունումը ՄԱԿ–ի Անվտանգության խորհրդում։ Փաստաթղթի ընդունմանը կողմ են քվեարկել ՄԱԿ ԱԽ–ի 11 անդամները, Չինաստանը, Վենեսուելան և Անգոլան ձեռնպահ են մնացել, Ռուսաստանը, որը Խորհրդի հինգ մշտական անդամներից մեկն է, կիրառել է վետոյի իրավունք։
Իսկանդարյանի խոսքով` ակնհայտ էր, որ Ռուսաստանը վետո կկիրառի ՄԱԿ–ի ԱԽ–ի որոշման հարցում։ Այն ժամանակ, երբ ձեռնարկվում էր այս ակցիան, պարզ էր, որ այն ուղղված է Ռուսաստանի դեմ։
«Ինձ թվում է, որ ամենահետաքրքիրն այն է, որ Չինաստանը ձեռնպահ մնաց։ Տեսականորեն քննությունն ու մեղավորների բացահայտումն անհրաժեշտ է, չնայած ինձ թվում է, որ Ուկրաինայում շարունակվող հակամարտության պատճառով աշխարհում ստեղծված իրավիճակում, արևմտյան հասարակության կողմից Ռուսաստանի նկատմամբ համապատասխան վերաբերմունքի դեպքում, Ռուսաստանի համար ի սկզբանե հասկանալի են հանձնաժողովի կամ դատարանի եզրահանգումները։ Այդ պատճառով Ռուսաստանը պարզապես չէր կարող չկիրառել նմանատիպ վետո», – ասաց Իսկանդարյանը։
Պատասխանելով այն հարցին, թե ինչպես է տեսնում իրադարձությունների հետագա զարգացումը` քաղաքագետն ասաց, որ տարբեր հարթակներում կշարունակվեն Ռուսաստանին մեղադրելու փորձերը։
Մալայզիական ավիաընկերության Ամստերդամ–Կուալա Լումպուր չվերթի Boeing 777 ինքնաթիռը վթարի էր ենթարկվել նախորդ տարվա հուլիսի 17–ին Դոնեցկի մարզում։ Ինքնաթիռում եղած բոլոր 298 ուղևորները մահացել էին։ Կիևը վթարի համար մեղադրել էր աշխարհազորայիններին, բայց նրանք հայտարարել են, որ չունեն այնպիսի միջոցներ, որոնցով կկարողանային ոչնչացնել օդանավն այդպիսի բարձրության վրա։ Նիդեռլանդների անվտանգության խորհրդի` վթարի պատճառների վերաբերյալ վերջնական զեկույցը կհրապարակվի 2015 թ.–ի հոկտեմբերի առաջին կեսին։
Փորձագետ. ՄԱԿ–ի ԱԽ–ի` МН17–ի վերաբերյալ որոշումը ցուցադրում է Ռուսաստան–Արևմուտք հարաբերությունների ճգնաժամը
Բաժանորդագրվել
MH17 ինքնաթիռի ավիավթարի հարցով միջազգային դատարան ստեղծելու նախագծի քվեարկությունը քաղաքական բաղկացուցիչ էր պարունակում, կարծում է քաղաքագետ Ալեքսանդր Իսկանդարյանը
