15:10 24 հոկտեմբերի 2017
Ուղիղ եթեր
Города мира. Ереван

Հայաստանում մամուլի հետ կապված խնդիրներն ավելի խորքային են. փորձագետ

© Sputnik/ Кирилл Каллиников
Հայաստան
Ստանալ կարճ հղումը
10 0 0

Մամուլն ազդեցիկ է լինում այն դեպքում, երբ կա քաղաքական ազատ համակարգ

ԵՐԵՎԱՆ, 31 հուլիսի –Sputnik. Հայաստանում մամուլը կարող է ազդեցիկ լինել միայն այն դեպքում, երբ հասարակությունն ազդեցիկ լինի: Թույլ հասարակության դեպքում՝ մամուլը թույլ է լինում: «Sputnik-Արմենիա» ռադիոկայանի հետ զրույցում նման տեսակետ է հայտնել քաղաքական և ընտրական տեխնոլոգիաների փորձագետ Արմեն Բադալյանը՝ խոսելով Խոսքի ազատության պաշտպանության կոմիտեի հրապարակած Հայաստանի վերաբերյալ զեկույցին:

Բանախոսը պնդում է, որ Հայաստանում մամուլի հետ կապված խնդիրն ավելի խորքային է, քան երևում է: «Մամուլի հզորության հիմնական պայմաններից մեկը  ֆինանսավորումն է, ինչը շատ կարևոր է: Մինչդեռ գիտենք, որ Հայաստանի տնտեսական կյանքն այսօր այնպիսին է, որ մամուլի մեծ մասը գտնվում է իշխող քաղաքական ուժի կամ այդ ուժին հարող ուժերի հսկողության տակ»,-ասել է նա:
Արևմտյան մամուլն ունի ֆինանսավորման մի քանի աղբյուրներ:

Բանախոսն ընդգծում է՝  ֆինանսավորվում են և՛ կուսակցությունները, և՛ հասարակական կազմակերպությունները, և՛ կան ֆինանսավորման այլ աղբյուրներ, որոնք լրատվամիջոցներն ավելի անկախ են դարձնում: «Եվ երկրորդը` գովազդի շուկան: Հայաստանում գովազդի շուկան բավական թույլ է, սպառողների գնողունակությունը՝ ցածր, ինչը նույնպես չի նպաստում մամուլի ֆինանսական անկախացմանը: Մամուլն ազդեցիկ է լինում այն դեպքում, երբ կա քաղաքական ազատ համակարգ, երբ մամուլի դերը գնահատվում է այդ համակարգի կողմից»,-ընդգծում է Արմեն Բադալյանը:

Այս համատեքստում քաղտեխնոլոգն ուշադրություն է հրավիրում նաև տպագիր մամուլի տպաքանակին, «որի շատ քիչ լինելը նույնպես վկայում է մամուլի նկատմամբ վերաբերմունքը»: «Մամուլի զարգացումը չպետք է առանձին դիտարկել: Այն կարող է զարգանալ, եթե հասարակությունը զարգանա: Եթե հասարակությունը չի զարգանում, ապա մամուլը մեկ-երկու լրագրողի միջոցով չի կարող զարգանալ»,-նկատում է նա:

Այն հարցադրմանը, թե քաղաքացիական հասարակության ձևավորման փորձերում մամուլը որևէ դերակատարում չունի՞, փորձագետը հավաստիացնում է՝ մամուլն ընդամենը ֆիքսում է առկա իրավիճակը: «Մինչդեռ մամուլը պարտավոր է ցույց տալ ապագան, իսկ դա կախված է լրագրողների մասնագիտական հմտություններից և դրան խանգարող ոչ մի բան չկա: Մամուլի ներկայացուցիչներից շատերը պարզապես չեն ցանկանում աշխատել իրենց գիտելիքների վրա»,- համոզմունք է հայտնել Արմեն Բադալյանը:

Գլխավոր թեմաներ