ԵՐԵՎԱՆ, 31 օգոստոսի – Sputnik. Հայաստանում հակակոռուպցիոն վիճակը 2003 թվականից ի վեր, ընդհանուր առմամբ, լճացած է. պատկերավոր ասած վիճակը կայուն վատ է: «Sputnik-Արմենիա» ռադիոկայանի հետ զրույցում նման մեկնաբանություն է արել է «Թրանսփարենսի ինթերնեյշնլ» հակակոռուպցիոն ՀԿ-ի գործադիր տնօրեն Վարուժան Հոկտանյանը՝ միաժամանակ հավելելով, որ, բարեբախտաբար, չենք հասել ավելի վատ վիճակի:
«Երեք-չորս տարի առաջ, մենք ավելի ցածր տեղ էինք զբաղեցնում, բայց դա ոչ թե նրանից, որ մեզանում վիճակը լավացել է, այլ պարզապես մի շարք երկրներում է դրությունն ավելի վատացել: Մեր դեպքում 2003-2008 թվականներին ոչ մի առաջընթաց կամ ետընթաց չկար: Այուհետեւ 2008-2011 թվականներին արձանագրվեց ետընթաց: Հիմա տեսնում ենք շարունակական աննշան բարելավումը»,-նշել է բանախոսը:
Վարուժան Հոկտանյանի խոսքով՝ եթե 2010 թ.-ի ուսումնասիրության արդյունքներով առավել կոռումպացվածը կրթության ոլորտն էր, ապա ներկայում այն մի փոքր զիջել է դիրքերը և այժմ առաջատարներն են՝ դատարանները և առողջապահությունը:
Կոռուպցիան կանխարգելող ցանկացած ինստիտուտ՝ պետական, թե ոչ պետական պետք է հիմնվի երկրի սոցիալական, տնտեսական, քաղաքական, մշակութային և պատմական առանձնահատկությունների վրա: Բանախոսն ընդգծում է, որ մշակութային և պատմական առաձնահատկությունները Հայաստանի դեպքում երբեք դրական չեն եղել: «Այն եղել է ավտորիտար և վերին աստիճանի կոռումպացված տարբեր կայսրությունների՝ պարսկական, օսմանյան ռուսական, ընդ որում՝ դրանց հետամնաց ծարամասերի դերում, բացի դրանից, խորհրդային անցյալից եկող առանձնահատկությունները, բնականաբար, բավական բարդացնում են իրավիճակը: Այնուհանդերձ, ամեն ինչ գցել մշակութային, պատմական անցյալի վրա, այնքան էլ ճիշտ չէ»,-ասել է նա:
Հասարակական և պետական կառույցներ՝գործակցությո՞ւն, թե՞ անջրպետ: է «Թրանսփարենսի ինթերնեյշնլ» —ի ղեկավարը դժվարանում է միանշանակ պատասխան տալ: «Իհարկե, չկա անջրպետ, խնդիրներ, սահմանափակումներ, բայց մյուս կողմից՝ անելիքներ դեռեւս շատ կան, այսինքն՝ մենք ասում ենք, քննադատում, իսկ նրանք, միեւնույն է, իրենց գործն են անում»,-ասել է բանախոսը:
Ինչ վերաբերում է Հայաստանի կառավարության որոշմանը՝ հակակոռուպցիոն խորհուրդ ձեւավորելու վերաբերյալ, ապա Հոկտանյանը նկատում՝«դժվար թե մի խորհրդով գարուն գա»: «Ծիծաղելի կլինի կարծել, որ այդ խորհուրդը կկարողանա արմատախիլ անել կոռուպցիան: Խնդրին պետք է ավելի համակարգային նայել: Այս խորհրդի ամբողջ կոնցեպտուալ հիմքը՝օրինապահ հանրային ծառայողի դասի ձևավորումն է: Բնականաբար, միայն դրանով կոռուպցիան չի նվազի Հայաստանում, և պետք չէ պատրանքներ ունենալ, որ միայն այդ ռազմավարությամբ հարցերը կլուծենք»,-շեշտադրել է «Թրանսփարենսի ինթերնեյշնլ» հակակոռուպցիոն ՀԿ-ի գործադիր տնօրենը:
