ԵՐԵՎԱՆ, 7 օգոստոսի — Sputnik. Հայտնի էքստրասենս, հիրոմանտ և գուշակ Անի Մաջնունյանի սպանության տեղեկությունը ցնցել է հայ հասարակությանը և բուռն քննարկումների պատճառ դարձել համացանցում:
Օգոստոսի 5-ի երեկոյան հայտնի էր դարձել, որ «Վեցերորդ զգայարան» շոուի մասնակիցներից մեկին սպանված են գտել սեփական տանը, ընդ որում` նրան սպանել էին բացառիկ դաժանությամբ: Մարմնի վրա դատաբժշկական փորձագետները 58 մարմնական վնասվածք էին հայտնաբերել։ Դիակի զննությամբ հայտնաբերվել էր դանակի շեղբ՝ մարմնի մեջ։
Սպանության մեջ կասկածվում է «Յանուս» հայկական թատրոնի տնօրեն, 20-ամյա Մուշեղ Մխիթարյանը, ով ժամանակավորապես բնակվում է Երևանի Նոր Նորք թաղամասում, բայց գրանցված է Խարբերդում:
Քննչական մարմիններն, ամենայն հավանականությամբ, դատարանին միջնորդություն կներկայացնեն նրա նկատմամբ խափանման միջոց ընտրելու վերաբերյալ:
Սպանված կնոջ բնակարանը տակնուվրա էր արված, տարբեր կողմեր էին նետված կահույքի դարակները, հագուստը և այլ իրեր թափթփված էին սենյակով մեկ:
Ի դեպ, հատկանշական է, որ բացի ոստիկաններից և քննիչներից, դեպքի վայր էր ժամանել Երևանի ոստիկանապետ, գեներալ մայոր Աշոտ Կարապետյանը:
Հանգուցյալի ծանոթները նրա մասին խոսելիս՝ բնութագրում են որպես հաճելի, շփվող կին և լավ մարդ: Մաջնունյանի ֆեյսբուքյան էջում մարդիկ անկեղծ ցավակցություն են հայտնում նրա մահվան կապակցությամբ:
Նա հայտնի հիրոմանտ էր, գուշակ, զբաղվում էր այլընտրանքային բժշկությամբ:
Եվ այսպես, ու՞մ էր խանգարում էքստրասենսը
Սպանության վարկածներ
Արդեն հաջորդ առավոտյան համացանցում զանազան վարկածներ էին պտտվում` կենցաղային վեճից մինչև քաղաքական պատվեր այն անձանցից, որոնց նա «ոչ այդքան պայծառ ապագա» էր գուշակել:
Սակայն քննիչները պաշտոնապես որևէ աշխատանքային վարկածներ դեռ չեն հայտնել: Գլխավոր կասկածյալին արդեն ձերբակալել են իրավապահ մարմինները: Ենթադրվում է, որ նա ցանկացել է թալանել Մաջնունյանին, սակայն հարևանները պնդում են, որ էքստրասենսն առանձնապես շռայլ կյանքով չէր ապրում:
Սպանության դաժանությունն ակամայից հանգեցնում է այն մտքին, որ հիրոմանտի ենթադրյալ դահիճը հոգեպես անհավասարակշիռ մարդ է եղել կամ դա կատարվել է սիրո հողի վրա:
Տաք հետքերով
Փաստն այն է, որ ոստիկանությունն արդեն կասկածյալ ունի, սակայն հանցագործության դրդապատճառներն առայժմ անհայտ են: Մնում է ենթադրություններ անել և սպասել քննության արդյունքներին:
Ո՞վ է սպանել էքստրասենսին
00:17 08.08.2015 (Թարմացված է: 18:20 13.08.2015)
Բաժանորդագրվել
Հանգուցյալի ծանոթները, նրա մասին խոսելիս, բնութագրում են որպես հաճելի, շփվող կին և լավ մարդ: Մաջնունյանի ֆեյսբուքյան էջում մարդիկ անկեղծ ցավակցություն են հայտնում նրա մահվան կապակցությամբ
