ԵՐԵՎԱՆ, 17 օգոստոսի– Sputnik. «Դոգմա» էթնիկ-պրոգրեսիվ ռոք խումբը հյուրախաղեր է սկսում Հայաստանում և Ղարաբաղում, տեղեկացրեց խմբի բաս–կիթառահար Վարդան Գրիգորյանը
«Սա պրագմատիկ նախագիծ չէ, նպատակը եկամուտ ստանալը չէ։ Սա լճացումից դուրս գալու փորձ է մեր կողմից։ Մենք ուզում ենք Հայաստանի բնակիչներին հասցնել մեր հիմնական ուղերձը` «ոչ միայն հացիվ»», –երկուշաբթի ասուլիսի ժամանակ ասաց Գրիգորյանը։
Նրա խոսքով` հյուրախաղերի միջոցով փորձ կարվի աշխուժացնել Հայաստանի մարզերի մշակութային կյանքը։
Նա նաև ընդգծեց, որ համերգները կկազմակերպվեն տեխնիկական ամենաբարձր մակարդակով։ Բոլոր ելույթները կուղեկցվեն կենդանի ձայնով, իսկ մուտքը կլինի անվճար։
«Հուսով ենք, որ սա օրինակ կդառնա մյուս երաժշտական համույթների համար, ինչպես նաև որակի բարձր չափանիշ կսահմանի», – ասաց Գրիգորյանը։
Խմբի վոկալիստ Զառա Գևորգյանն ավելացրեց, որ կենդանի համերգի կուլտուրան պետք է աստիճանաբար ներդրվի նաև Հայաստանի մարզերում։
Հյուրախաղերի շրջանակում առաջին համերգը տեղի կունենա օգոստոսի 20–ին Վանաձորում, օգոստոսի 21–ին «Դոգման» ելույթ կունենա Գյումրիում, օգոստոսի 23–ին` Սիսիանում։ Օգոստոսի 25–ին ռոք խումբը կուրախացնի իր ստեփանակերտցի երկրպագուներին, օգոստոսի 27–ին և 28–ին ելույթ կունենա Կապանում և Գորիսում։ Հյուրախաղերը կավարտվեն օգոստոսի 31–ին Արմավիրում։
«Դոգմա» ռոք խումբը ստեղծվել է 2008թ.–ին։ Խմբի կազմում ելույթ են ունենում կիթառահարներ Վարդան Գրիգորյանն ու Հենո Գրիգորյանը, երգչուհի Զառա Գևորգյանն ու թմբկահար Գոռ Ավետիսյանը։
Խումբը համադրում է հայկական էթնիկ մեղեդիներն ու պրոգրեսիվ «մետալը»։ Ռոք խումբը մասնակցել է բազմաթիվ միջազգային փառատոների, արժանացել է պարգևների, ելույթ է ունեցել հայտնի երաժիշտների հետ, որոնք դրական կարծիք են հայտնել երաժշտական համույթի մասին։
«Դոգմա» ռոք խումբն աննախադեպ հյուրախաղեր է սկսում
Բաժանորդագրվել
Համերգները կկազմակերպվեն տեխնիկական ամենաբարձր մակարդակով։ Բոլոր ելույթները կուղեկցվեն կենդանի ձայնով, իսկ մուտքն անվճար կլինի, տեղեկացրեց խմբի բաս–կիթառահար Վարդան Գրիգորյանը
