Լևոն Արոնյանն առաջին հաղթանակն է գրանցել Սինկֆիլդի գավաթի մրցաշարում

ԵՐԵՎԱՆ, 24 օգոստոսի– Sputnik. Նախօրեին Սենտ Լուիսում կայացած Սինկֆիլդի գավաթի առաջին փուլում հայ գրոսմայստեր Լևոն Արոնյանը հաղթել է իտալացի Ֆաբիո Կարուանային։

Հոլանդացի Անիշ Գիրին պարտության է մատնել Ալեքսանդր Գրիշչուկին (ՌԴ), նորվեգացի Մագնուս Կառլսենը` բուլղարացի Վեսելին Տոպալովին, ամերիկացի Հիկարու Նակամուրան հաղթել է հնդիկ Վիշվանաթան Անանդին, իսկ ամերիկացի Ուեսլի Սոն զիջել է ֆրանսիացի Մաքսիմ Վաշիե–Լագրավին։

Երկրորդ փուլում Արոնյանն ուժերը կչափի Վաշիե–Լագրավի հետ, Տոպալովը` Նակամուրայի, Գիրին` Սոյի, Կարուանան` Կառլսենի, իսկ Գրիշչուկը` Անանդի հետ։

Սինկֆիլդի գավաթը (Sinquefield Cup) Grand Chess Tour–ի մի մասն է և անցկացվում է շրջանակային համակարգով օգոստոսի 23–ից սեպտեմբերի 3–ն ընկած ժամանակահատվածում։ Տրվում է 120 րոպե առաջին 40 քայլերի համար, այնուհետև` 60 րոպե մինչև հանդիպման ավարտը` յուրաքանչյուր քայլի համար 30 վայրկյան ավելացմամբ։