Պատգամավոր Կարեն Ավագյանի եղբայրը պատգամավորի ավտոմեքենայով վրաերթի է ենթարկել հետիոտնին

ԵՐԵՎԱՆ, 24 օգոստոսի– Sputnik. Oգոստոսի 23-ին ժամը 23:30-ի սահմաններում Toyota Corolla մակնիշի ավտոմեքենայի վարորդ, 38-ամյա Արթուր Ավագյանը Աճառյան պողոտայում վրաերթի է ենթարկել  28-ամյա Էդգար Սնխչյանին, հաղորդում է shamshyan.com կայքը:

Վրաերթի ենթարկվածը քաղաքացիների օգնությամբ տեղափոխվել է «Սուրբ Գրիգոր Լուսավորիչ» բժշկական կենտրոն: Դեպքի վայր են ժամանել Ճանապարհային ոստիկանության աշխատակիցները: Տեղում քննչական աշխատանքները ղեկավարում է Հայաստանի քննչական կոմիտեի Երևանի քննչական վարչության հատկապես կարևոր գործերով ավագ քննիչ Մանվել Մուրադյանը, ում կողմից փաստի առթիվ նյութեր են նախապատրաստվում:

Նշվում է, որ ավտոմեքենայի դիմապակուց բացակայել է տեխզննման կտրոնը, իսկ մեքենայի վրա տեղադրված է եղել օրենքով արգելված գերձայնային համակարգ:

Հրապարակման մեջ նշված է, որ Toyota-ի համարանիշները հաշվառված են ԱԺ հաշվեկշռում, և մեքենան սպասարկում է ԱԺ պատգամավոր, ՀՀԿ երիտթևի ղեկավար Կարեն Ավագյանին, իսկ վրաերթի հեղինակ Ա. Ավագյանը Կ. Ավագյանի եղբայրն է, ով աշխատում է Երևանի Վ. Բրյուսովի անվան լեզվաբանական համալսարանում՝ որպես ֆինանսատնտեսական գծով պրոռեկտոր, վրաերթի ենթարկվածն էլ ՍՊԸ-ի տնօրեն է, ով զբաղվում է տորթերի պատրաստմամբ ու առաքմամբ: Քննիչի հանձնարարականով ավտոմեքենան տեղափոխվել է Երևանի ՃՈ պահպանվող հատուկ տարածք:

Մի քանի ժամ առաջ Կարեն Ավագյանը Facebook սոցիալական ցանցի իր էջում գրառում է կատարել այս դեպքի կապակցությամբ. «Դժբախտ դեպքերից ոչ ոք ապահովագրված չէ։ Ցավոք, մեր ընտանիքն էլ չի խուսափել նման պատահարից։ Ցավում եմ կատարվածի հետ կապված։ Հիվանդին շուտափույթ ապաքինում եմ մաղթում։

Եղբայրս դեպքի պահից վթարի ենթարկվածի կողքին է մինչ այժմ։ Քննչական գործողություններն ընթանում են, ընթանում են խստորեն օրենքի սահմաններում։ Ինքս եմ անձամբ հետևում ընթացքին ու անաչառությանը:

Մենք մեծ դժբախտություն ենք ունեցել այս գիշեր:

Պատգամավորը խնդրել է անհարկի շահարկումներով, իրականության հետ կապ չունեցող գունավորումներով չավելացնել իրենց և տուժողի ընտանիքիների ցավը: