ԵՐԵՎԱՆ, 3 սեպտեմբերի – Sputnik. ՀՀ արդարադատության նախարարության Քրեակատարողական վարչության հանձնաժողովն այսօր` սեպտեմբերի 3-ին, օրվա երկրորդ կեսին կորոշի, թե որտեղ է իր հետագա պատիժը կրելու դերասան Վարդան Պետրոսյանը։ Այս մասին Sputnik Արմենիա պորտալին հայտնեց ԱՆ քրեակատարողական վարչության հասարակայնության հետ կապերի պատասխանատու Գոռ Ղլեչյանը։
Հիշեցնենք, որ 2013թ.–ի հոկտեմբերի 20-ին Եղվարդ-Երևան մայրուղու վրա դերասանի մեքենան բախվել էր մեկ այլ մեքենայի, որի հետևանքով 7 մարդու տեղափոխել էին հիվանդանոց, այդ թվում` Վարդան Պետրոսյանին։ Ավելի ուշ տուժածներից երկուսը մահացել էին։
Փաստի առիթով հարուցվել էր քրեական գործ՝ ՀՀ Քրեական օրենսգրքի 242 հոդվածի 3-րդ մասով: Վարդան Պետրոսյանը ձերբակալվել էր: Դատաքննությունը սկսվեց 2014 թվականի մարտի 12-ին: Հայաստանի Կոտայքի մարզի ընդհանուր իրավասության դատարանը 2015թ. հունվարի 29-ին մեղավոր ճանաչեց Վարդան Պետրոսյանին՝ նրան դատապարտելով 5 տարի ժամկետով ազատազրկման:
Նուբարաշեն քրեակատարողական հիմնարկից Վարդան Պետրոսյանը երեկ երեկոյան տեղափոխվել է ժամանակավոր կացարան, որտեղ սպասելու է ՀՀ քրեակատարողական վարչության հանձնաժողովի որոշմանը` հետագա պատիժը բաց ռեժիմով կրելու պայմանների վերաբերյալ:
Այն հարցին, թե Վարդան Պետրոսյանն այժմ առողջական խնդիրներ ունի, թե ոչ, Գոռ Ղլեչյանը պատասխանեց, որ այս պահին նա ստացիոնար բուժման կարիք չունի։
Տուժող կողմի փաստաբան Ռուբեն Բալոյանը Aravot.am-ին ասել է, որ Վարդան Պետրոսյանին ազատ արձակելու որոշում չկա: «Ինքը շարունակելու է պատիժը կրել, նրան մեկուսարանից տեղափոխել են կողքի գաղութ, որտեղ պատիժը կրում են անզգուշությամբ հանցագործություն կատարած անձինք: Հիմա ինքն էլի անազատության մեջ է, սխալ տեղեկատվություն է տարածվել, որ նա ազատ արձակվեց»,- ասել է Բալոյանը:
Բալոյանի խոսքով, Վարդան Պետրոսյանը անազատության մեջ կմնա այնքան ժամանակ, մինչև աշխատանքային պայմանագիր ներկայացվի քրեակատարողական հիմնարկի ղեկավարին, որ ինքը խնամքի տակ ունի անձինք, և խնդրեն թույլտվություն, որ ցերեկային ժամերին իրեն թույլ տան աշխատել. «Մինչև այս գործընթացը չավարտվի, ինքը դուրս չի գալու: Ինքն այս պահին ազատության մեջ չէ»:
Բաց ուղղիչ հիմնարկում դատապարտյալը պահվում է մինչև տասը մարդու համար նախատեսված բնակելի կացարանում:
Ուղղիչ հիմնարկների ներքին կանոնակարգին համապատասխան` բաց ուղղիչ հիմնարկում դատապարտյալը կարող է տեղաշարժվել գիշերային ժամերին՝ ուղղիչ հիմնարկի այդ նպատակով նախատեսված տարածքի սահմաններում, իսկ ցերեկային ժամերին՝ ուղղիչ հիմնարկի տարածքի սահմաններում, և ուղղիչ հիմնարկի պետի թույլտվությամբ՝ դրանից դուրս։
Բաց ուղղիչ հիմնարկում դատապարտյալներին անջատ պահելու` սույն օրենսգրքի 68-րդ հոդվածով սահմանված սկզբունքները չեն գործում, և դատապարտյալները պահվում են հասարակական համակեցության կանոններին համապատասխան:
Բաց ուղղիչ հիմնարկում դատապարտյալին պահելու պայմանների առանձնահատկությունները սահմանվում են ուղղիչ հիմնարկների ներքին կանոնակարգով:
