Նոր Համահայկական խորհուրդը կպաշտպանի աշխարհասփյուռ հայության շահերը

ԵՐԵՎԱՆ, 26 սեպտեմբերի– Sputnik.  Հայոց ցեղասպանության 100–րդ տարելիցի միջոցառումները համակարգող պետական հանձնաժողովը շաբաթ օրը կայացած նիստի ժամանակ նոր կառույցի` Համահայկական խորհրդի ստեղծման մասին որոշում է կայացրել։

Ինչպես լրագրողներին հայտարարեց նախագահի աշխատակազմի ղեկավարի, Հայոց ցեղասպանության 100–րդ տարելիցին նվիրված միջոցառումների համակարգող Վիգեն Սարգսյանը, Համահայկական խորհրդի ուշադրության կենտրոնում կլինեն աշխարհասփյուռ հայության խնդիրները։

Նա հիշեցրեց, որ նախորդ տարվա սեպտեմբերին կայացած Հայաստան–Սփյուռք համաժողովի ընթացքում ՀՀ նախագահ Սերժ Սարգսյանն առաջարկել է քննարկել մշտապես գործող համահայկական մարմնի ստեղծումը, որը կզբաղվի աշխարհասփյուռ հայության հարցերով։

Վիգեն Սարգսյանն ավելացրեց, որ այս տարի իրականացված համատեղ աշխատանքը ցույց տվեց իր արդյունավետությունը։

«Հետևաբար նշված հարցերը քննարկելիս հանձնաժողովի բոլոր անդամները միաձայն կողմ հանդես եկան համապատասխան աշխատանքների անցկացմանը։ Ձևավորվել է հատուկ խումբ` ՀՀ Սահմանադրական դատարանի նախագահ Գագիկ Հարությունյանի գլխավորությամբ», – ասաց Սարգսյանը։

Խմբի քարտուղարը Վիգեն Սարգսյանն է։

Համահայկական խորհրդի առաջին նիստը

«Համագործակցելով բոլոր կառույցների և սփյուռքի հետ` մենք կանենք հնարավոր ամեն ինչ, որպեսզի Համահայկական խորհրդի առաջին նիստը կազմակերպվի հաջորդ տարի` Հայաստանի անկախության 25–րդ տարեդարի կապակցությամբ», – ավելացրեց Սարգսյանը։

Նա նշեց, որ շուտով կանցկացվի լրացուցիչ նիստ, որի ընթացքում կամփոփվեն Հայոց ցեղասպանության 100–րդ տարելիցին նվիրված միջոցառումները, ինչպես նաև կվերլուծվեն բոլոր ծրագրերը։

Ցեղասպանության հետևանքները վերացնելու խնդիրները

Այնուհետև ՍԴ նախագահ Գագիկ Հարությունյանը Սերժ Սարգսյանին փոխանցեց Հայոց ցեղասպանության հետևանքների վերացման իրավական խնդիրների փաթեթը։ Հարությունյանի խոսքով` Հայոց ցեղասպանության 100–րդ տարելիցին նվիրված միջոցառումները համակարգող պետական հանձնաժողովի նիստի ընթացքում ներկայացվել է իր գլխավորած փորձագիտական հանձնաժողովի զեկույցը։

«Հանձնաժողովը դիմել էր Իրավաբանների համահայկական համաժողովին` Ցեղասպանության խնդիրներին վերաբերող խնդիրների հարցում աջակցություն ստանալու համար», – ասաց Հարությունյանը։

Նա նշեց, որ դեռևս այս տարվա հունիսին ստեղծվել է այդ հարցերով զբաղվող հատուկ գիտահետազոտական կենտրոն,  որը գլխավորել է ՀՀ ՍԴ–ի մասնագետ Վլադիմիր Վարդանյանը։

«Կենտրոնին հաջողվել է մշակել իրավական հարցերի փաթեթ, որը ես պաշտոնապես փոխանցել եմ նախագահին։ Այս փուլում այն հրապարակման ենթակա չէ», – նշեց Հարությունյանը։

Նա ավելացրեց, որ փաթեթը կքննարկվի նոյեմբերի 20–21–ին, ինչից հետո որոշ առաջարկներ կներկայացվեն  հանրությանը։