ԵՐԵՎԱՆ, 30 սեպտեմբերի– Sputnik. Հայաստանի սահմանամերձ Բաղանիս համայնքի ղեկավար Նարեկ Սարգսյանը շնորհակալություն է հայտնել Քրիստինե Պեպելյանին` հոնորարը գյուղին փոխանցելու նախաձեռնության համար, հայտնում է iravunk.com-ը։
«Այսօր առավոտյան համացանցից տեղեկացա ու հաճելիորեն զարմացա, որ մեր էստրադային երգչուհի Քրիստինե Պեպելյանը «Էրեբունի-Երևան» տոնակատարության իր հասանելիք հոնարարը կկրկնապատկի սեփական միջոցներից և կնվիրի սահմանամերձ Բաղանիսին:
Հարգելի՛ Քրիստինե, իմ, ավագանու և ողջ համայնքի բնակիչների անունից հայտնում ենք մեր խորին շնորհակալությունը նման գեղեցիկ ու հաճելի վերաբերմունքի համար և սիրով Ձեզ սպասում ենք մեր համայնքում: Թող Ձեր այս քայլը օրինակ ծառայի մյուսներին… Սահմանն ամուր է, եթե թիկուքը գործում է»:
Ի պատասխան Պեպելյանն իր ֆեյսբուքյան էջում ընդգծել է, որ գուցե չարժեր ևս մեկ անգամ անդրադառնալ այս թեմային, բայց նրան գրառումը այնքան հուզեց, որ չկարողացավ անտարբեր լինել:
«Կլինեմ հնարավորինս հակիրճ. նախ թույլ տվեք Ձեզ վստահեցնել, որ իմ կոլեգաները՝ հայ երաժիշտներից յուրաքանչյուրը, միշտ պատրաստակամ են օգնելու ոչ միայն Ձեր համայնքին, այլև սահմանամերձ յուրաքանչյուր համայնքի:
Ինչպես նաև շնորհակալ եմ ջերմ խոսքերի համար ու վստահեցնում եմ, որ առաջին իսկ հնարավորության դեպքում ներկա կգտնվեմ ձեր համայնքում և սիրով կերգեմ մեր հայրենակիցների համար։ Շնորհակալ եմ»,- գրել է` երգչուհին:
Հիշեցնենք, որ նախօրեին երգչուհի Քրիստինե Պեպելյանը Ֆեյսբուքի իր պաշտոնական էջում գրել էր, որ «Էրեբունի-Երևան» տոնակատարությունից գոյացած հոնորարը պատրաստվում է փոխանցել Բաղանիսի գյուղապետարանին։
Առաջարկը մեծ արձագանք էր ստացել Ֆեյսբուք սոցիալական ցանցում, Բախշյանի առաջարկին միացել էին բազմաթիվ օգտատերեր, ստորագրահավաք էր սկսվել։ Սակայն այս առաջարկը դրական ընթացք չստացավ, և քաղաքապետերանը հայտարարություն տարածեց այն մասին, որ «Էրեբունի-Երևան 2797» միջոցառումներն իրականացվելու են ամբողջությամբ։