ԵՐԵՎԱՆ, 13 դեկտեմբերի — Sputnik, Անի Լիպարիտյան. Մենք սովոր ենք ամեն օր փողոցներում անտուն շներ ու կատուներ տեսնել:
Մեր կրտսեր բարեկամները շատերի համար կյանքի անբաժանելի մասն են դարձել: Իհարկե, լավ կլիներ, որ յուրաքանչյուր կենդանի տուն ունենար, ընկերներ ու կացարան, իսկ պետությունն էլ հոգ տաներ, որ մեր երկրում ավելի շատ լինեին մեր փոքրիկ ընկերների համար նախատեսված օթևանները:
Այսօր այդ պատասխանատու գործը ստանձնել են կամավորները: Ինչպե՞ս կարելի է անտարբեր մնալ` նայելով փոքրիկ շան կամ կատվի աչքերին, որոնք ձեր քնքշանքի, ուշադրության ու ջերմության կարիքն ունեն: Անտարբեր չի կարողացել մնալ նաև Dingo կազմակերպության համակարգող Գոհար Մանուշակյանը:
«Սկզբում կատվի ձագ գնեցի, իսկ հետո` շուն», — պատմում է Գոհարը:
Այժմ նրա տանը բնակվում է 6 շուն, 4 կատու և մեկ գերմանամուկ: Նրանցից մի քանիսին նա փողոցում է գտել, բերել տուն, լողացրել, կերակրել ու այլևս դուրս չի արել:
Հետաքրքիր է, որ կենդանիներն ապրում են հաշտ ու համերաշխ: Այնքան են մտերմացել, որ «փոքրիկ գազանանոցի» բնակիչները քնում են Մանուշակյանի անկողնում։
Բոլորը հրաշալի գիտեն կամ գոնե պատկերացնում են, որ կենդանիների մասին հոգ տանելը հեշտ գործ չէ: Անհրաժեշտ է գումար, ժամանակ և համբերություն: Եվ պետք է չմոռանալ նրանց անասնաբույժի մոտ տանել: Եթե դուք որոշել եք կենդանի պահել, նա էլ ձեր կողքին պետք է իրեն լավ զգա:
«Շնիկներին, որոնց դրսից եմ բերել, ինքս եմ շշից կերակրում: Բոլորի մասին ինքս եմ հոգ տանում, ոչ ոք ինձ չի օգնում: Ինքս եմ նրանց զբոսանքի տանում: Նրանք կամակոր չեն և սիրում են միմյանց, իսկ երբ ես տանը չեմ, նրանք քնում են», — պատմեց Մանուշակյանը:
Ընդ որում, հիվանդ կենդանիներին նա թողնում է իր մոտ, իսկ առողջներին նվիրում է: «Մեր կազմակերպությունը երբեք չի վաճառում կենդանիներին: Մենք պարզապես նվիրում ենք», — ասում է նա:
Մանուշակյանը նաև նշում է, որ բժիշկ չլինելով` փորձում է օգնել իր անասնաբույժ ընկերներին կենդանիներին բուժելու դժվարին հարցում, քանի որ Dingo-ում նա պատասխանատու է ոչ միայն կազմակերպչական հարցերի, այլև բժշկական կլինիկայի համար։
«Մեր կրտսեր բարեկամներին շուտ ես ընտելանում և շատ կապվում: Հետո, իհարկե, չափազանց դժվար է լինում բաժանվել նրանցից», — ասում է Մանուշակյանը:
Մեր օրերում շատ արդիական է կենդանիների պաշտպանության թեման, որոնց աշխարհի մի շարք երկրներում դաժան են վերաբերվում:
Զրույցի ավարտին մեր հերոսուհին մի գործնական խորհուրդ տվեց. «Մարդի՛կ, սովորե՛ք լինել շնորհակալ, հավատարիմ, հոգով մաքուր ու բարի, ինչպես կենդանիները»:
