ԵՐԵՎԱՆ, 15 դեկտեմբերի — Sputnik. «Երկրաշարժ» ֆիլմը պատմում է Հայաստանում տեղի ունեցած հզոր երկրաշարժի մասին։
«Բարեկամներ, կարող եք շնորհավորել մեզ։ Հենց նոր ռեժիսոր Սարիկ Անդրեասյանն ասաց այն, ինչին երկար էինք սպասել. «Վերջ, նկարահանված է»։ Մի խոսքով, մենք ավարտեցինք «Երկրաշարժ» ֆիլմի նկարահանումները», — այս գրառումը հրապարակվել է ֆիլմը նկարահանող «Մարս Մեդիա» ընկերության ֆեյսբուքյան էջում։
Ինչպես ավելի վաղ Sputnik-ի հետ զրույցում պատմել էր ֆիլմի ռեժիսոր Սարիկ Անդրեասյանը, ֆիլմի հիմնական մասը նկարահանվել է Մոսկվայում, քանի որ բարոյական տեսանկյունից այդպես ավելի ճիշտ էր։
«Ամենածանր պահերը մենք ցանկանում էինք Մոսկվայում նկարահանել, որպեսզի դա չանեինք Հայաստանում և բնակչությանը ցավ չպատճառեինք, չէ՞ որ այդ իրադարձությունները դեռ թարմ են մարդկանց հիշողության մեջ, և շատերն են անցել դրա միջով։ Ֆիլմի հիմնական նկարահանումներն անցկացվել են լքված գործարանի տարածքում, որտեղ 50 հազար քմ տարածքի վրա կառուցվել էին ավերված Լենինականի դեկորացիաները։ Դերասանների մեծ մասը հայեր են։ Ընդ որում, գրեթե բոլորն այս կամ այն կերպ առնչվել են 1988 թվականի ողբերգությանը», — նշել է Անդրեասյանը։
