ԵՐԵՎԱՆ, 28 դեկտեմբերի — Sputnik, Գոհար Սարգսյան. Տնային գործերն ավարտելուց հետո Անժելա տատիկը նստում է իր փոքրիկ հեռուստացույցի դիմաց և դիտում սիրելի հաղորդումներն ու սերիալները: Նա գիտի միայն հեռակառավարման վահանակի համապատասխան կոճակները սեղմելն ու ալիքները փոխելը: Անժելա տատիկը երբևէ չի լսել «անալոգային» կամ «թվային» տերմինները:
«Աղջիկ ջան, նման բաներից գլուխ չեմ հանում, մենակ լսել եմ, որ հունվարի 1-ից ինչ-որ փոփոխություն են անելու, ու էս հին հեռուստացույցը բանի պետք չի լինելու: Ուղղակի մտածում եմ` առանց հեռուստացույցի չմնամ: Մենակ մարդու համար էս ա միակ ընկերը»,-պատմում է Անժելա տատիկը:
Կառավարության որոշմամբ` սոցիալապես անապահով 48 հազար 733 ընտանիք թվային հեռուստատեսության ընդունիչ սարքեր է ստանալու:
«Եթե նկատի ունենք այն հեռուստացույցները, որոնք 25-30 տարեկան են, ապա դրանք լիովին համակցելի են այն սարքերի հետ, որոնք անվճար հիմունքով կտրամադրվեն սոցիալապես անապահով մարդկանց: Ընդունիչ սարքերը հեռուստացույցին համակցելը շատ հեշտ է, իսկ եթե ոմանք չկարողանան ինքնուրույն միացումներն անել, մենք սիրով կօգնենք մեր քաղաքացիներին»,-ասում է «Հայաստանի հեռուստատեսային և ռադիոհաղորդիչ ցանց» ՓԲԸ-ի տնօրեն Գրիգոր Ամալյանը:
Տարածված հաղորդագրության համաձայն, 2016 թվականի հունվարի 1-ից հայկական հեռուստատեսությունը լիովին անցում էր կատարելու անալոգայինից թվային հեռարձակման: Սակայն ժամկետները երկարաձգվել են:
«Դա օրենքով էր սահմանված, սակայն այս պահի դրությամբ պատրաստ չենք ընդունիչ սարքեր տրամադրել: Ուստի տոնական օրերին անջատումներ չեն լինի: Հունվարի երկրորդ կեսին գործընթացն ավարտին կհասցնենք: Ասեմ, որ թվային հեռարձակումը Հայաստանի համար նոր երևույթ չէ, քանի որ հունիսի 30-ին հանրապետության ամբողջ տարածքում ավարտվել է թվայնացման գործընթացը: Մեր քաղաքացիների մի մասն այսօր հեռուստացույց է դիտում թվային ձևաչափով, որը ձայնի ու պատկերի հիանալի որակ է ապահովում: Միայն թե անալոգայինն այս պահին ամբողջությամբ անջատել չենք կարող, որովհետև ընդունիչ սարքերը բաժանված չեն»,-ասում է «Հայաստանի հեռուստատեսային և ռադիոհաղորդիչ ցանց» ՓԲԸ-ի տնօրեն Գրիգոր Ամալյանը:
Այս պահին Հայաստանում գործում են թե՛ անալոգային, թե՛ թվային ձևաչափերը։: Պատկան մարմինները որոշել են գործընթացն իրականացնել «առանց ցնցումների»: Հայաստանում ստեղծվելու է պետական թվային հեռարձակող ցանց: Ըստ այդմ, Երևանում գործելու է 18 հեռուստաալիք: Սակայն հեռարձակման ծավալներն ավելի լայն են:
«18 հեռուսաալիք դիտելու հնարավորություն կունենա Հայաստանի բնակչության 54 տոկոսը ոչ միայն Երևանում, այլև Կոտայքի, Արմավիրի ու Արագածոտնի որոշ շրջաններում: Մյուս մարզերում կդիտեն 9 հեռուստաալիք»,-տեղեկացնում է Գրիգոր Ամալյանը:
Նա ասում է նաև, որ մեկ տարի հետո Հայաստանի խանութներում հնարավոր չի լինի գտնել անալոգային հեռուստացույց, և դա ժամանակի հրամայականն է: Եթե որևէ մեկը գտնի 2015 թվականի վերջին եռամսյակում արտադրված հեռուստացույց, դա մեծ հայտնագործություն կլինի: Աշխարհն անցել է թվային հեռարձակման:
Թվայնացված հեռուստատեսությունն ունի մի քանի առավելություն. նախ պատկերի ու ձայնի հիանալի որակ է ապահովվում, և հետո, եթե որևէ հաղորդում եք բաց թողել, ստիպված չեք լինի սպասել կրկնությանը. կարելի է հաղորդումը կանգնեցնել և հետ ու առաջ տալ:
