13:51 20 օգոստոսի 2017
Ուղիղ եթեր
Заседание по делу об убийстве семьи Аветисян российским военнослужащим Валерием Пермяковым

Պերմյակով. «Ինձ համար ռազմակայանի տարածքում ավելի ապահով է»

© Sputnik/ Асатур Есаянц
Հայաստան
Ստանալ կարճ հղումը
407 0 0

Դեկտեմբերի 18-ին Գյումրիում, ռուսական ռազմակայանի տարածքում անցկացվող դատավարության ժամանակ Վալերի Պերմյակովը հայտարարել է, որ ինքը նախընտրում է մնալ ռուսական ռազմակայանի տարածքում

ԵՐԵՎԱՆ, 18 հունվարի — Sputnik. Sputnik Արմենիայի թղթակիցը Գյումրիից հայտնում է, որ դատական նիստի ժամանակ հայտարարված ընդմիջումից հետո Վալերի Պերմյակովին դատական դահլիճ բերեցին առանց ձեռնաշղթաների։

Մինչ ընդմիջումը Ավետիսյանների իրավահաջորդների շահերի պաշտպան փաստաբանների կողմից ներկայացվել էր դատը Շիրակի մարզի առաջին ատյանի դատարանում անցկացնելու վերաբերյալ միջնորդությունը, որտեղ կար այն պնդումը, որ ռազմակայանի տարածքում անցկացնելն արհամարհանք է Հայաստանի դատական համակարգի նկատմամբ և խախտում է նաև Պերմյակովի իրավունքները, քանի որ վերջինը գտնվում է վանդակում։

Միջնորդությանը միացել էին Ավետիսյանների իրավահաջորդների շահերի բոլոր պաշտպաններն ու փաստաբանները, իսկ դատավոր Հարություն Մովսիսյանի այն հարցին, թե Պերմյակովն ինչ կարծիք ունի այդ միջնորդության վերաբերյալ, Պերմյակովը նշել էր. «Ինձ համար միևնույն է, տարբերություն չկա»։

Մինչդեռ ընդմիջումից հետո, երբ դատավոր Հարություն Մովսիսյանը կրկնեց հարցը, Պերմյակովն ասաց.

«Ինձ համար ռազմակայանի տարածքում ավելի ապահով է»։

Դատավորը մերժեց միջնորդությունը` հայտարարելով, որ ոչ մի հիմք չկա այդ միջնորդության` արտագնա նիստը ռազմակայանի տարածքից Շիրակի մարզի ընդհանուր իրավասության առաջին դատարան տեղափոխելու համար։ Փաստաբանները հանդես եկան նոր միջնորդությամբ` ժամանակ տրամադրելու, որպեսզի իրենք կարողանան ձևակերպել նոր միջնորդություն` դատավորի և դատախազի բացարկի համար։

Հիշեցնենք, որ Գյումրիում, որտեղ տեղակայված է 102-րդ ռուսական ռազմակայանը, 2015 թվականի հունվարի 12-ին սպանվել էր մի ամբողջ ընտանիք, մեկուկես տարեկան երեխան մահացել էր մեկ շաբաթ անց հիվանդանոցում։ Հանցագործության կասկածանքով նույն օրը ձերբակալվել էր ռուս պայմանագրային զինծառայող Վալերի Պերմյակովը: Նա փորձել էր անցնել Թուրքիայի տարածք, և ռուս սահմանապահները նրան հայտնաբերել էին հենց սահմանին: Զենք հափշտակելու և դասալքության համար 2015 թվականի օգոստոսի 12-ին Գյումրիում դատարանը Պերմյակովին դատապարտել է 10 տարի ազատազրկման։ Սպանության մասին գործը հանձնվել է հայկական կողմին և քննվում է առանձին, առաջին նիստը տեղի էր ունեցել դեկտեմբերի 18-ին։

 

 

Գլխավոր թեմաներ