ԵՐԵՎԱՆ, 18 հունվարի — Sputnik. Ռուսական ռազմակայանի տարածքում անցկացվող դատական նիստի ժամանակ Ավետիսյանների իրավահաջորդների շահերի պաշտպանները հայտնեցին, որ դատավոր Հարություն Մովսիսյանի ինքնաբացարկի մասին միջնորդության համար հիմք է հանդիսացել ինչպես նախորդ, այնպես էլ դատական նիստի ընթացքը և դատավորի պահվածքը:
«Այս նիստերը ցույց են տալիս, որ դատավորն անկողմնակալ չէ, ավելին` կաշկանդված է»,- նշեց Ավետիսյանների իրավահաջորդներից մեկի պաշտպան Լուսինե Սահակյանը:
Դատավոր Հարություն Մովսիսյանը դիմեց Վալերի Պերմյակովին` ցանկանալով պարզել նրա կարծիքը միջնորդության վերաբերյալ: Դատավորին զարմացրեց Պերմյակովի պատասխանը
«Չեմ առարկում»,- ասաց Պերմյակովը:
Այս պահին ընդմիջում է հայտարարվել, Ավետիսյանների իրավահաջորդների պաշտպանների ներկայացրած միջնորդության արդյունքը պարզ կդառնա ավելի ուշ։
Հիշեցնենք, որ Գյումրիում, որտեղ տեղակայված է 102-րդ ռուսական ռազմակայանը, 2015 թվականի հունվարի 12-ին սպանվել էր մի ամբողջ ընտանիք, մեկուկես տարեկան երեխան մահացել էր մեկ շաբաթ անց հիվանդանոցում։ Հանցագործության կասկածանքով նույն օրը ձերբակալվել էր ռուս պայմանագրային զինծառայող Վալերի Պերմյակովը: Նա փորձել էր անցնել Թուրքիայի տարածք, և ռուս սահմանապահները նրան հայտնաբերել էին հենց սահմանին: Զենք հափշտակելու և դասալքության համար 2015 թվականի օգոստոսի 12-ին Գյումրիում դատարանը Պերմյակովին դատապարտել է 10 տարի ազատազրկման։ Սպանության մասին գործը հանձնվել է հայկական կողմին և քննվում է առանձին, առաջին նիստը տեղի էր ունեցել դեկտեմբերի 18-ին։
