ԵՐԵՎԱՆ, 20 հունվարի-Sputnik. Աշխատանքի և սոցիալական հարցերի նախարար Արտեմ Ասատրյանը կարծում է, որ նպաստների համար նախատեսված 4 միլիարդ դրամից անկանխիկ վճարման անցնելու դեպքում շուրջ 40 միլիոն դրամ կխնայվի, ընթացակարգերը կպարզեցվեն:
Գործող օրենսդրության համաձայն` առաջին ու երկրորդ երեխայի ծննդյան դեպքում միանվագ վճարվում է 50 հազար դրամ, երրորդ և չորրորդ երեխայի դեպքում՝ 1 միլիոն, իսկ հինգերորդ երեխայի դեպքում 1.5 միլիոն դրամ:
Առաջին և երկրորդ երեխաների համար տրամադրվող 50 հազար դրամները և երրորդ ու չորրորդ երեխայի 500 հազար դրամը կանխիկ է վճարվում: Դրամագլխի համար հաշիվ է բացվում:
Արտեմ Ասատրյանը նշում է, որ այս տարվա ընթացքում ընտանեկան դրամագլուխը տնօրինելու իրավունք կստանա 13500 ընտանիք:
«Ընթացակարգը հնարավորություն է տալիս, որպեսզի քաղաքացին կարողանա անսական 25 հազար դրամ կանխիկ ստանալ, եթե կա դրա անհրաժեշտությունը»,-ասաց Արտեմ Ասատրյանը:
Ի դեպ, այս տարվանից մայրության նպաստ չաշխատող հղիներին տրամադրվող մայրության նպաստները նույնպես կվճարվեն անկանխիկ:
