10:39 23 հոկտեմբերի 2018
Ուղիղ եթեր
  • USD484.13
  • GBP630.63
  • EUR556.80
  • RUB7.41
Арцах, НКР

Ղարաբաղյան հակամարտություն. Թեհրանը՝ որպես Մինսկի խմբի այլընտրանք

© Weltrekordreise
Հայաստան
Ստանալ կարճ հղումը
13 0 0

Իրանի ԱԳՆ պաշտոնական ներկայացուցիչ Հուսեյն Ջաբեր Անսարին Բաքվում հունվարի 25-ին հայտնել է, որ Իրանը պատրաստ է միջնորդ հանդիսանալ Հայաստանի ու Ադրբեջանի միջև լեռնային Ղարաբաղի հակամարտության կարգավորման հարցում

ԵՐԵՎԱՆ, 25 հունվարի — Sputnik, Դավիթ Գալստյան. Ղարաբաղի հակամարտության գործընթացում Իրանի մասնակցության հավանականությունը մոտ ապագայում շարունակում է կասկածելի մնալ, կարծում են փորձագետները:

«Սա առաջին դեպքը չէ, երբ Իրանը պատրաստակամություն է հայտնում միջնորդական առաքելությամբ հանդես գալ: Ժամանակին նրանք նման առաքելություն իրականացնում էին: Սակայն անհրաժեշտ է հաշվի առնել, որ կողմերը բանակցություններ են վարում ԵԱՀԿ Մինսկի խմբի շրջանակներում, իսկ այդ ձևաչափում փոփոխություններ, մեր տվյալների համաձայն, չեն սպասվում», — Sputnik Արմենիա պորտալին ասաց իրանագետ Վարդան Ոսկանյանը:

Նրա կարծիքով՝ իրանական կողմի նման պահվածքը ողջունելի է ու արժանի հարգանքի, սակայն հարկ է հաշվի առնել, որ բոլոր բանակցություններն ընթանում են ԵԱՀԿ ՄԽ առկա ձևաչափի սահմաններում:

Փորձագետը նշում է, որ Իրանի իսլամական հանրապետությունը լուրջ կապեր ունի ոչ միայն Հայաստանի, այլև Ադրբեջանի հետ, սակայն այդ փոխհարաբերությունները միանգամայն տարբեր են:

«Եթե Հայաստանի հետ դրանք բացառապես բարեկամական են, ապա Ադրբեջանի հետ, մեղմ ասած, մի շարք խոչընդոտներ կան: Ու այս համատեքստում Իրանի շահագրգռվածությունը ղարաբաղյան հակամարտության կարգավորման հարցում բավականին տրամաբանական է ու պետք է միայն ողջունվի», — նշեց Ոսկանյանը:

Մեկ այլ իրանագետ` Գոհար Իսկանդարյանը, նշում է, որ Իրանի նման հայտարարությունները հնչել են նաև նախկինում, սակայն դա չի ազդել բանակցությունների ձևաչափի վրա:

«Շատ տարիների ընթացքում Իսլամական հանրապետությունը նման հայտարարություններ է անում: Սակայն հարցն այն է, որ մենք հետևում ենք Մինսկի ձևաչափին, և ԵԱՀԿ ՄԽ-ն բավական արդյունավետ է աշխատել այդ ուղղությամբ երկար տարիներ», — ասաց Իսկանդարյանը:

Նրա խոսքով՝ եթե ձևաչափը փոխվի, ապա ստիպված կլինեն աշխատանքը զրոյից սկսել, ինչը Հայաստանին ձեռնտու չէ: Նա համոզված է, որ հայկական իշխանությունները կշարունակեն բանակցությունները ՄԽ շրջանակներում, առավել ևս, որ համանախագահները բավական ակտիվ են աշխատում:

«Նոր մասնակիցներ չեն կարող ներգրավվել այստեղ», — կարծում է իրանագետը:

Հայաստանը, նրա կարծիքով, չի գնա ԵԱՀԿ-ի շրջանակներում զուգահեռ գործող ևս մեկ ձևաչափի ստեղծման:

Հայաստանի արտաքին գործերի նախարարությունում էլ ավելի լակոնիկ են մեկնաբանել իրանական միջնորդության հավանականությունը:

«Մենք գտնում ենք, որ ղարաբաղյան հակամարտության բանակցային գործընթացը պետք է իրականացվի ԵԱՀԿ ՄԽ ձևաչափում», — Sputnik Արմենիա պորտալին ասաց ԱԳՆ մամուլի քարտուղար Տիգրան Բալայանը:

Նրա խոսքով՝ սա ճիշտ ձևաչափ է, որն ապացուցել է իր արդյունավետությունն ու կենսունակությունը:

 

 

Գլխավոր թեմաներ