Անի Լիպարիտյան, Sputnik.
Շոտլանդական պոնիներն ազատության մեջ ապրում են միջինը 20-25 տարի, սակայն եթե նրանց պահում են կենդանաբանական այգում կամ բուծարանում` ավելի երկար։ Ամեն դեպքում Երևանի կենդանաբանական այգու բնակիչը՝ Բարմալեյ անունով պոնին, արդեն 34 տարեկան է:
Այդ ընթացքում նա բազմիցս ցույց է տվել իր բնավորությունը:
«Բարմալեյը ծնվել է 1982թ.-ի մայիսի 2-ին Հայաստանում: Նա կոշտ բնավորություն ունի, չի սիրում շփվել տեղի պոնիների և ձիերի հետ, իսկ ահա մարդկանց հետ հեշտ ու հաճույքով է լեզու գտնում»,- պատմում է տեղի հսկիչներից մեկը:
Պարզվում է՝ Բարմալեյը տեղի հսկիչների սիրելիներից է, քանի որ մարդկանց սրտերը նվաճել է նրանց նկատմամբ բարությամբ:
Ամենայն հավանականությամբ, շոտլանդացուն նման «էկզոտիկ» անուն են տվել, քանի որ նա երկար մազեր ունի։ Ու նաև Բարմալեյը շատ է սիրում կարգուկանոն և լռություն:
«Նա իրեն մեծի պես է պահում, ու այդ պոնին մի քիչ ծանր բնավորություն ունի: Նա այնքան էլ չի սիրում նորեկ ձիերին»,- պատմեցին կենդաբանական այգու աշխատակիցները:
Նրանք կատակում են, որ նրան նույնիսկ պետք չէ խնամել, քանի որ ինքն իր մասին հոգ է տանում:
«Մոտենում ես ձիերին ու տեսնում, որ Բարմալեյը հպարտ միայնության մեջ ուտում է: Իսկ մյուսներին պետք է հետևել, կերակրել: Այս պոնին մի կողմ է գնում, ուտում իր կերակրամանից, ոչ ոքի մոտ չի թողնում»,- պատմեց հսկիչը:
Կենդանաբանական այգում լուրեր են պտտվում, որ նա շատ ուժեղ է:
«Իհարկե, նա ընկերուհիներ է ունեցել, որոնք արդեն չկան: Տվյալ պահին Բարմալեյը վեց կնոջից բաղկացած մի ողջ հարեմ ունի»,- կատակում է Sputnik Արմենիայի զրուցակիցը:
Պարզվեց նաև, որ կենդանաբանական այգու ամենածեր բնակիչը տեղի լեգենդն է, քանի որ Բարմալեյն արդեն 34 տարեկան է, և նրա մասին հոգ է տարել աշխատողների մի քանի սերունդ: Ամենաերիտասարդ հսկիչը կենդանուց մի տարով է մեծ: Բայց նա կատակում է, որ հասակակիցներ են:
Կենդանաբանական այգու ամենակրտսեր բնակիչը՝ «ամանորյա» շնակապիկը, ընդամենը 1 ամսական է: Նա ծնվել է 2015թ.-ի դեկտեմբերի 31-ին: Բայց Կենդանաբանական այգու աշխատակիցները չեն կարողանում մոտենալ փոքրիկին, քանի որ մայրը ոչ ոքի մոտ չի թողնում։ Պաշտպանում է։
Հենց այդ պատճառով փոքրիկի սեռը մինչև հիմա անհայտ է:
Երևանի կենդանաբանական այգում բնակվում է 144 տեսակի 1037 կենդանի:
