01:08 25 սեպտեմբերի 2017
Ուղիղ եթեր
Такси. Ереван

Չքանդվող թնջու՞կ, թե՞ տաքսիստի կամակորություն

Photolur
Հայաստան
Ստանալ կարճ հղումը
12710

Տաքսու վարորդ, հասարակություն, ճանապարհային երթևեկություն, քաղաքային իշխանություն. այս թնջուկը, թվում է, երբեք էլ չի քանդվի: Տաքսիստները միշտ դժգոհ են իշխանությունից, հասարակությունը՝ տաքսիների վարորդներից, ու այսպես շարունակ: Ռադիոլսող վարորդներն իրենց խնդիրները բարձրաձայնելու համար դիմել են Sputnik Արմենիա ռադիոկայանին:

ԵՐԵՎԱՆ, 21 փետրվարի — Sputnik. Կարմիր գծանշումները պատուհաս են դարձել վարորդների համար: Ամբողջ օրվա վաստակած գումարով տուգանքներ ենք վճարում, ասում են վարորդները ու բողոքում, որ դրան գումարվել է նաև նոր խնդիր՝ քաղաքային իշխանությունը վարորդներին չի թույլատրում կայանել այն վայրում, որտեղ կայանել են տարիներ շարունակ:

Խոսքը Հյուսիսային պողոտայում, նախկին «Մոսկվիչկա» խանութի դիմաց կայանելու մասին է: Նախկինում որևէ խնդիր չի եղել ավտոտեսչության հետ, նշանները դրված են եղել, բոլորը ներողամտաբար են մոտեցել:

«Դեկտեմբերի սկզբին սկսեցին տուգանել այդտեղ կայանելու համար: Մենք խնդրում ենք ավտոտեսչությանը, որ սուպերմարկետի մոտ մի քանի տեղ հատկացնեն ավտոմեքենայի համար»,- ասում է վարորդ Ֆելիքս Խաչատրյանը:

Նրանք շեշտում են, որ աշխատած գումարը չի բավականացնում ավտոմեքենան գազով լիցքավորելու և տուգանքը վճարելու համար: Վաստակում են օրական 7-8 հազար դրամ, իսկ որևէ կոնկրետ տեղում չկանգնելու ու քաղաքում անընդհատ պտտվելու դեպքում վաստակած գումարի մեծ մասը ծախսում են գազալցման համար:

Այլ վայրում չեն կարող կանգնել, որովհետև գործում է «էս սարն իմն է, էս ծառն իմն է» սկզբունքը:

«Մենք 3-4 տարի այդ վայրում ենք կանգնում, քաղաքի բոլոր տաքսիստներն իրենց տեղն ունեն, մեզ թույլ չեն տա զբաղեցնել ուրիշի տեղը»,- ասում են վարորդները:

Տաքսիստների բողոքը կապված է նաև Թումանյան-Տերյան խաչմերուկի հատվածում սև գծանշաններ գծելու հետ, որոնց համաձայն՝ արգելվում է այդ վայրում կանգնել: Նախկինում այդտեղ կարմիր գծանշաններ են եղել:

«Ես կարմիր գծին կանգնել եմ 3-4 րոպե, իսկ ճանապարհային ոստիկանության կանոնների համաձայն՝ տաքսիստին թույլատրվում է կանգնել մինչև 5 րոպե, դիմել եմ ավտոտեսչություն, մերժել են դիմումս՝ ասելով, որ ես խաչմերուկում խոչընդոտել եմ մյուս մեքենաների երթևեկությունը: Ես տարեկան 12 հազար դրամ վարձ եմ վճարում կարմիր գծերի համար, եթե արգելվում է, ինչու՞ են կարմիր գիծ գծել, դա հատուկ խա՞յծ է վարորդներին տուգանելու համար»,- բողոքում է տաքսու վարորդ Գեղամ Ավալյանն ու վստահեցնում, որ այնտեղ կարելի է տեղեր հատկացնել տաքսիների համար, որպեսզի գոնե երկու ավտոմեքենա կանգնի:

Sputnik Արմենիան վարորդների բողոքը ներկայացրեց Ճանապարհային ոստիկանությանը: Ճանապարհային ոստիկանության պետի տեղակալ Արմեն Խաչատրյանին զարմացրեց այն փաստը, որ խնդիրը ներկայացվել է լրատվամիջոցներին, քանի որ դրա համար պատասխանատու մարմիններ կան:

«Բազմաթիվ նման ողջամիտ առաջարկություններ են եղել թե՛ տաքսու վարորդների, թե՛ բնակիչների կողմից: Մենք քննարկել ենք, և դիմողների համար տրվել են դրական պատասխաններ: Ես այս պահին չեմ կարող ասել, թե ինչ տրամաբանությամբ է երթևեկությունը կազմակերպված նշված վայրում, սակայն մենք պատրաստ ենք քննարկել և կարճ ժամանակում տալ համապատասխան լուծումներ: Եթե լինեն ողջամիտ առաջարկներ, որոնք կհիմնավորվեն մասնագիտական ուսումնասիրության արդյունքում, դրանք կբավարարվեն: Եթե վարորդները հայտնում են, որ կարմիր գծանշումների վրա կայանելով ստացել են վարչական ակտեր, կարծում եմ՝ նման իրավիճակ չպետք է առաջանա»,- ասաց Արմեն Խաչատրյանը:

Նա նշեց, որ եղել են դեպքեր, երբ ներկանյութը մաքրվել է: Նման դեպքերում վարչական իրավախախտման որոշման վերաբերյալ որոշումները բեկանվել են:

Ճանապարհային ոստիկանության պետի տեղակալի խոսքով՝ բողոքող վարորդները պետք է ներկայանան, և ներկայացված խնդիրները առարկայական քննարկման դրվեն:

Ինչ վերաբերում է Թումանյան-Տերյան հատվածում կարմիր գծանշումների վրա սև ներկանյութով ներկելուն, ապա, ըստ Խաչատրյանի, դա կատարվել է երթևեկության կազմակերպման փոփոխման հետևանքով: Այսինքն այդ վայրում արդեն չի կարելի կանգնել:
Sputnik Արմենիան վարորդներին անհանգստացնող հարցերի պատասխանը ստանալու նպատակով դիմեց նաև Երևանի քաղաքապետարանի տրանսպորտի վարչության պետ Հենրիկ Նավասարդյանին:

«Նախկինում «Մոսկվիչկա» խանութի մոտով անցնող Հին երևանցի փողոցն ու Տերյան փողոցը երկկողմանի փողոցներ էին: Շուրջ մեկ տարի է՝ միակողմանի են դարձել, որոշակի ձևաչափային փոփոխություններ են կատարվել, և քանի որ նախկին «Մոսկվիչկա» խանութը գտնվում է շրջադարձային մասում, այդտեղ կանգնում կազմակերպել հնարավոր չէ, հենց այդ պատճառով էլ տաքսիստների համար համապատասխան կայանտեղ չի նախատեսվել»,- ասաց տրանսպորտի վարչության պետը:

Իսկ ինչ վերաբերում է այն հարցին, որ տաքսիստները «սեփականաշնորհում» են կայանատեղերը, ու մեկ ուրիշը չի կարողանում օգտվել նույն կայանատեղից, ապա տրանսպորտի վարչության պետը հիշեցրեց, որ կայանատեղերը հավասար են բոլոր տաքսիստների համար, և բոլորը իրավունք ունեն նշված տեղերում կայանել առանց որևէ արգելքի:

«Կայանատեղերի հարցը որոշվում է հետևյալ կերպ՝ քաղաքապետարանն ու ճանապարհային ոստիկանությունը համատեղ ուսումնասիրում են վայրը, այն փողոցը, որտեղ կարելի է տաքսու կայանատեղ կազմակերպել, և համապատասխան ճանապարհային տեխնիկական միջոցներով կահավորում են՝ տաքսիստներին անվճար կայանում թույլատրելու համար: Այսօր Երևանում 118 կայանտեղ կա մոտավորապես 600 տաքսի մեքենայի համար: Այնպես որ այդ կայանատեղերը բոլորի համար հավասարազոր են»,- ասաց Հենրիկ Նավասարդյանը:

Իրավասու մարմինների պատասխանները կարծես թե  սպառիչ են, քաղաքային իշխանությունը տաքսիստների հանդեպ որևէ դիտավորություն չի ունեցել, երբ փոփոխություններ է կատարել երթևեկության ձևաչափում, կայանելու համար նախատեսված վայրերն էլ կան, տաքսիստները կարող են կանգնել ուրիշ մի վայրում՝ առաջնորդվելով տրանսպորտի վարչության պետի նշած հավասարազորության սկզբունքով, սակայն իրականությունը այլ է: ճանապարհային ոստիկանությունը խախտումների համար շարունակելու է տուգանել, տաքսիստը շարունակելու է բողոքել, իսկ այդ ամենի հետևանքով, ինչպես միշտ, տուժելու է հասարակ քաղաքացին, որովհետև տաքսիստներն իրենց անթիվ-անհամար տուգանքները վճարելու համար բարձրացնում ու դեռ բարձրացնելու են իրենց ծառայության արժեքը:

Գլխավոր թեմաներ