ԵՐԵՎԱՆ, 25 փետրվարի — Sputnik. Հունգարիայի Գիոր քաղաքում մեկնարկած հրաձգության Եվրոպայի առաջնությունում Հայաստանի ներկայացուցիչները սկսել են պայքարը, հայտնում է ՀԱՕԿ լրատվության բաժինը:
Տղամարդկանց 10մ վազող թիրախ վարժությունում Հայաստանի ներկայացուցիչ Ռազմիկ Մինասյանը խոցեց 540 միավոր և զբաղեցրեց 11-րդ տեղը: Շանթ Սարգսյանը 13-րդն է 536 միավորով և Հովհաննես Խաչատրյանը 535 միավորով 14-րդ տեղում է: Ռազմիկ Մինասյան, Շանթ Սարգսյան և Հովհաննես Խաչատրյան եռյակը վազող թիրախ տղաների վարժության թիմային պայքարում գրավել է 3-րդ տեղը:
Պայքարին մասնակցող 5 թիմերից 1677 միավորով 1-ին տեղն է գրավել Ուկրաինայի թիմը, Ռուսաստանը 1643 միավորով 2-րդ տեղում է, և 1611 միավորով լավագույն եռյակը եզրափակել Հայաստանի թիմը:
Կանանց պայքարում Լիլիթ Մկրտչյանը խոցելով 348 միավոր` զբաղեցրեց 7-րդ հորիզոնականը:
Ավելի ուշ պայքարի մեջ կմտնեն 10 մ. օդամղիչ հրացան կրակող երիտասարդները՝ Հայկ Բաբայանը և Վրեժ Թորոսյանը:
