ԵՐԵՎԱՆ, 25 փետրվարի-Sputnik. Գոհար Սարգսյան. Հայաստանի տնտեսությունը գնահատվում է որպես բլոկադային տնտեսություն, որի պայմաններում մենաշնորհային տնտեսության ստեղծումն ու ամրապնդումը շատ ավելի դյուրին է, քան կազմալուծման գործընթացը։ Այս համոզմունք ունի էկոնոմիկայի նախարար Արծվիկ Մինասյանը։ Նա ի պաշտոնե պատրաստվում է այնպիսի քայլեր իրականացնել, որոնց միջոցով հնարավոր կլինի Հայաստանում պայքարել արմատներ ձգած մենաշնորհի դեմ։
«Սահմանադրական փոփոխություններով ամրագրված է հստակ հակամենաշնորհային քաղաքականություն։ Դա ամրագրված է նաև ՀՅԴ-ի ու ՀՀԿ-ի քաղաքական համաձայնագրում, այն բխում է նաև հանրապետության նախագահի փետրվարի 12-ի ելույթից։ Իսկ դա նշանակում է, որ պետք է վերանայել քաղաքականությունը, որից պետք է բխեցնենք կոնկրետ մարմինների լիազորությունների հստակեցումը և գործիքակազմը»,-ասաց Մինասյանը։
Նախարարն ավելացրեց նաև, որ իր ղեկավարած կառույցն իրականացնելու է գործողություններ, որոնք համահունչ են լինելու Եվրամիության հակամենաշնորհային օրենսդրության պահանջներին և նաև մեր երկրում ազատ շուկայական պայմանների ստեղծմանը։
«Լինելու են նոր մոտեցումներ և ազատ շուկայական հարաբերությունների խաղի նոր կանոններ»,-ավելացրեց Արծվիկ Մինասյանը։
Նա պատասխանեց նաև լրագրողների այն հարցին, թե նախարարի պաշտոնը ստանձնելուց հետո էլ է պայքարելու պարտադիր կուտակային կենսաթոշակային համակարգի չեղարկման դեմ, Մինասյանը դրական պատասխան տվեց։ Պատգամավոր եղած ժամանակ Արծվիկ Մինասյանը քննադատում էր այդ նախագիծը։
«Իմ դիրքորոշումը չի փոխվել, որովհետև դա նաև քաղաքական ուժի դիրքորոշում է։ Կգա ժամանակ, մեր տեսակետները կբարձրացնենք»,-ասաց նախարարը։
Ըստ նրա` քաղաքական համաձայնագրում հստակ ամրագրված են տնտեսական քաղաքականության նոր ուղղությունները և հիմնական անելիքները, որոնք բխում են սահմանադրական փոփոխություններից, այն է` շուկայական սոցիալական տնտեսակարգի հաստատում։ Նշանակում է` տնտեսական քաղաքականության առկա ծրագրերը կշարունակվեն, ու դեռ նոր ծրագրեր և հիմնարար բարեփոխումների փաթեթ կմշակվի։
