23:56 18 օգոստոսի 2017
Ուղիղ եթեր
Армянская альпинистка на горе Арарат

Հրաշագործ լեռը. Արարատ

Армянская федерация альпинизма
Հայաստան
Ստանալ կարճ հղումը
12010

Արարատ լեռը ոչ միայն Հայաստանի խորհրդանիշն է, այլև օժտված է յուրահատուկ, կախարդական էներգիայով։ Լեռան հզորությունն ու յուրահատուկ ուժը զգացել է նաև լեռնագնաց Նարինե Ջագարյանը։

Անի Լիպարիտյան, Sputnik.

Մասնագիտությամբ իրավաբան Նարինե Ջագարյանը, ով արդեն մի քանի տարի նվաճում է աշխարհի տարբեր բարձունքները, Sputnik Արմենիային ներկայացրեց իր պատմությունը։ 2014 թվականի օգոստոսին Նարինեն որոշեց բարձրանալ Արարատ լեռը և իրականացրեց իր որոշումը։

Արարատի կախարդանքը

Նարինեն խոստովանում է, որ ամենաբարդ վերելքն իր համար եղել է Էլբրուսի նվաճումը, սակայն ամենահիշվողը սուրբ Արարատ լեռ բարձրանալն էր։

«Ամենազգացմունքային վերելքս եղել է Արարատը: Գագաթին մենք լեռնագնացների խմբով հասանք օգոստոսի 13-ին», — Sputnik Արմենիայի հետ հարցազրույցում ասաց լեռնագնացը։

Նա նշում է, որ վերելքն իրեն բավական հեշտ է տրվել, այնքան ոգևորված է եղել, որ բացարձակ հոգնածություն չի զգացել, սարը շատ մեծ ուժ ու էներգիա է հաղորդել իրեն։

«Արարատ որպես լեռնագնաց չեմ գնացել, այլ որպես հայ` կարոտս առնելու, լեռան հետ շփվելու։ Կարող է տարօրինակ հնչի, սակայն Արարատը հայերի համար հատուկ նշանակություն ունի», — ասում է Նարինեն։

Նա պատմեց, որ շատ ոգևորված է եղել, և նույն վիճակում էին բոլոր նրանք, ովքեր այդ օրը պետք է հաղթահարեին սուրբ լեռան բարձունքը։

Армянские альпинисты на горе Арарат
Армянская федерация альпинизма
Հայ ալպինիստները Արարատ լեռան վրա

Նարինեն խոստովանում է, որ այդ պահին իրեն թվաց, որ ողջ թիմը դարձավ մեկ մարմին։

«Բոլորս էլ նույն զգացմունքներով էինք գնում դեպի Արարատ` կարոտած։ Զգացմունքները խառնվել էին` և´ տխուր էինք, և´ ուրախ: Շատ խառը հուզական վիճակում էինք», — պատմեց Sputnik Արմենիայի զրուցակիցը։

Ինչպես հայուհին նվաճեց լեռները

Նարինեն լեռնագնացների մի խմբի հետ վերջերս է վերադարձել Իրանից, որտեղ նվաճել է Դեմավենդ լեռը։

Армянские альпинисты на горе Демавенд
Армянская федерация альпинизма
Հայ լեռնագնացները Դեմավենդ բարձրանալիս

«Ցանկացած վերելք էլ որոշակի դժվարություններ ունի: Դեմավենդի պարագայում սառը եղանակն էր։ Ձմեռային վերելքների ժամանակ ցուրտը էներգիա է տանում, ավելի դժվարացնում է քայլելը։ Սակայն վերջին անգամ ամեն ինչ տանելի էր», — ասաց Նարինեն։

Նա բարձրացավ Դեմավենդ հինգ լեռնագնացների հետ, որոնցից 3-ը աղջիկ էին։

Դեմավենդ նա բարձրանում էր երկրորդ անգամ։ Առաջին անգամ այդ լեռը բարձրացել է 2015 թվականի հուլիսին։

Армянские альпинисты на горе Демавенд с флагом Федерации альпинизма
Армянская федерация альпинизма
Հայ լեռնագնացները Դեմավենդի գագաթին` Ալպինիզմի ֆեդերացիայի դրոշով

«Ամենաբարձր գագաթն ինձ համար հենց Դեմավենդն է եղել: Բարձրացել եմ նաև Արարատ, Հեզար, Էլբրուս և Կազբեկ», — ասում է Նարինեն։

Բարձունքում լեռների սիրահարը զգույշ է։ Ասում է, որ ինչքան վերև ես բարձրանում, այնքան դժվար է լինում ու վտանգավոր, թթվածնի պակասն իր «սև գործն» անում է։

Սակայն ամեն դեպքում միայն համարձակներին են տրվում վերելքները։ Լեռնագնացությունը Նարինեի համար կենսակերպ է դարձել, չէ՞ որ «լեռներից ավելի լավը կարող են լինել միայն լեռները, որոնք դեռ ոչ ոք չի նվաճել…»։

Гора Эльбрус
Армянская федерация альпинизма
Դեմավենդ

 

 

Գլխավոր թեմաներ