ԵՐԵՎԱՆ, 8 մարտի — Sputnik. Գյումրու անօթևան 13 ընտանիքի բնակարանով ապահովելու նպատակով «SOS Գյումրի» թիմը նախաձեռնել է մարտի 19-ին բարեգործական աճուրդ իրականացնել:
«SOS Գյումրի» թիմն արդեն իր էջում հրապարակում է լոտերի ցանկը:
Առաջինն աշխարհահռչակ ջազ երաժիշտ Տիգրան Համասյանի վերնաշապիկն է ներկայացվել՝ նրա ստորագրությամբ։ «The Song տեսահոլովակի 5։20 րոպեից Տիգրանը կրում է հենց այս վերնաշապիկը»,- տեղեկացնում են նախաձեռնության անդամները:
Ներկայացվել են նաև հունահռոմեական ոճի ըմբշամարտի աշխարհի չեմպիոն, օլիմպիական խաղերի փոխչեմպիոն Արսեն Ջուլֆալակյանի ստորագրությամբ մարզակոշիկները:
Ըստ տեղեկության` լոտերի թվում են «Ռեալ Մադրիդի» ֆուտբոլիստների ստորագրությամբ մարզաշապիկ, որի վրա նաև կոչ է գրված լինելու՝ «Օգնե՛լ Գյումրու անօթևաններին», ավելի վաղ ձեռք էր բերվել լոտ «Բարսելոնայից» ՝ դրոշ Մեսիի և 10 աստղերի ստորագրությամբ: Լոտերի ցանկում են Յուրա Մովսիսյանի, Հենրիխ Մխիթարյանի մարզաշապիկները, Վարդան Մինասյանի վերնաշապիկը և գնդակը, Արարատ-73-ի ստորագրությամբ գնդակ:
