ԵՐԵՎԱՆ, 24 մարտի- Sputnik. «Զվարթնոց» օդանավակայանում ընդհանուր առմամբ խուճապ չկա, ոստիկանները շրջում են օդանավակայանում։ Տարածքում են նաև ԱԱԾ-ի աշխատակիցները, որոնք հրաժարվում են տեղեկություն հայտնել։
«Մի խանգարեք, խոչընդոտում եք մեր աշխատանքը»,- ասաց շան հետ շրջող աշխատակիցներից մեկը։
ՀՀ կառավարությանն առընթեր Քաղավիացիայի գլխավոր վարչության մամուլի խոսնակ Ռուբեն Գրդզելյանն էլ ռումբի առկայության վերաբերյալ գրառում է արել Ֆեյսբուք սոցիալական ցանցի իր էջում։
«Ս. Թ. մարտի 24-ին ստացվել է տեղեկատվություն, որ «Զվարթնոց» օդանավակայանի տարածքում իբր պայթյուն է տեղի ունենալու: Հայաստանի Հանրապետության կառավարության առընթեր քաղաքացիական ավիացիայի գլխավոր վարչությունում ընդունվել է որոշում ըստ սահմանված կարգի այդ մասին տեղեկացնել համապատասխան պետական կառույցներին: Վերջիններս ձեռնարկել են բոլոր անհրաժեշտ հակազդող գործողությունները: Տեղեկատվության ստուգելու արդյունքում դեռևս ոչինչ չի հայտնաբերվել»,- գրել է Գրդզելյանը։
