ԵՐԵՎԱՆ, 25 մարտի-Sputnik. Նիստում հրապարակվեցին ձգաբանական եզրակացությունների արդյունքները, որի ժամանակ փորձագետներն ուսումնասիրել են ոչ միայն Ավետիսյանների տանը հայտնաբերված հետքերը, այդ թվում` նաև կրակողների, այլև դրանք համադրել դիակների փորձագիտական եզրակացությունների հետ։
Ըստ այդ եզրակացությունների` հնարավոր է ասել, որ հաստատ արթուն է եղել ընտանիքի տղան` Արմեն Ավետիսյանը, ով փորձել է երրորդ ննջասենյակից գնալ երկրորդ ննջասենյակ, և հենց այդ պահին հետ է շպրտվել և ընկել մահճակալի կողքը։
Մարմնի վնասվածքներից կարելի է եզրակացնել, որ արթուն է եղել նաև ավագ Սերյոժա Ավետիսյանը։ Ինչպես Sputnik Արմենիայի թղթակցի հետ զրույցում նշեց Ավետիսյանների իրավահաջորդների շահերի պաշտպան, փաստաբան Երվանդ Վարոսյանը, կա նաև ԴՆԹ-ի եզրակացություն այն մասին, որ նա բռնել է նաև հրացանի փողից, այս փաստը կհրապարակվի ավելի ուշ։
«Կարող ենք ասել, որ ավագ Հասմիկ Ավետիսյանը ևս արթուն է եղել, ինչն ակնհայտ է նրա դիրքից։ Երեխաների մասով որևէ բան նշել սխալ է։ Արաքսյան` հարսը ևս հավանաբար եղել է արթուն մահճակալի մեջ, բայց շարժվելու փորձ չի կատարել։ Այս իրավիճակը մենք արձանագրում ենք, և շատ կարևոր է այն հետո համադրել ամբաստանյալների ցուցմունքների հետ։ Արդյունքում արդեն պարզ կլինի, թե ինչքանով է այդ նկարագրությունը համընկնում այս եզրակացության հետ»,- նշեց Վարոսյանը։
Այն հարցին, թե արդյոք չէի՞ն կարող արթուն եղած տղամարդիկ որևէ բան ձեռնարկել, փաստաբանը նշեց, որ տունը շատ փոքր է, որպեսզի որևէ մեկը կարողանար որևէ բան ձեռնարկել։
«Պատկերացրեք` ձեր առջև կանգնած է զինվոր` լիցքավորված հրացանով և պատրաստ կրակելու։ Ես չեմ պատկերացնում, թե ինչ կարելի էր անել։ Ակնհայտ է` տան տղամարդիկ ինչ-որ գործողությունների փորձեր արել են։ Եթե մարդը փորձում է հրացանի փողից բռնել կամ մի սենյակից մյուսը գնալ, ուրեմն ինչ-որ բան փորձել են անել»,- ասաց փաստաբանը։
Նրա խոսքով` գործին ծանոթանալու ամենածանր պահերից մեկը եղել է մոդելավորումը` ռուս քննիչների կողմից Պերմյակովի մասնակցությամբ, որի ընթացքում վերականգնվել է Ավետիսյանների տան նման մակետ, և Պերմյակովը, հերթականությամբ պատմելով, նկարագրել է իր արած գործողությունները, ինչն էլ տեսագրվել է։ Այդ տեսագրությունը ևս կհրապարակվի։
Նիստը շարունակվում է։
Գյումրիում, որտեղ տեղակայված է 102-րդ ռուսական ռազմակայանը, 2015 թվականի հունվարի 12-ին սպանվել էր մի ամբողջ ընտանիք, մեկուկես տարեկան երեխան մահացել էր մեկ շաբաթ անց հիվանդանոցում։ Հանցագործության կասկածանքով նույն օրը ձերբակալվել էր ռուս պայմանագրային զինծառայող Վալերի Պերմյակովը: Նա փորձել էր անցնել Թուրքիայի տարածք, և ռուս սահմանապահները նրան հայտնաբերել էին հենց սահմանին: Զենք հափշտակելու և դասալքության համար 2015 թվականի օգոստոսի 12-ին Գյումրիում դատարանը Պերմյակովին դատապարտել է 10 տարի ազատազրկման։ Սպանության մասին գործը հանձնվել է հայկական կողմին և քննվում է առանձին, առաջին նիստը տեղի էր ունեցել դեկտեմբերի 18-ին։
