17:39 19 սեպտեմբերի 2017
Ուղիղ եթեր
Хорен Абраамян

Ապրիլմեկյան աչքալուսանք Խորեն Աբրահամյանից

© Abisoghomyan
Հայաստան
Ստանալ կարճ հղումը
4410

Երբ ծնվել է ապագա ժողովրդական արտիստ, դերասան Խորեն Աբրահամյանը, հայրը շտապել է ուրախ լուրը հայտնել քույրերին։ Սակայն սկզբում նրան չեն հավատացել ու հաղորդածը որպես ապրիլմեկյան կատակ են ընդունել։ 1930 թվականի այս օրը ծնվել է Խորեն Աբրահամյանը

ԵՐԵՎԱՆ, 1 ապրիլի — Sputnik. «Շատերի համար ապրիլի 1-ը ծիծաղի կամ ստի օր է, իսկ ինձ համար, հպարտության և խորհելու, ծանրութեթև անելու. այդ օրն աչքալուսանք են տվել` տղա ունեցանք, իսկ դրանից տարիներ հետո Մոնթեն գոռացել է` Քարվաճառն ազատագրված է»,- մի առիթով ասել է Խորեն Աբրահամյանը։

Հզոր հետք թողած դերասան։ Սա այն բնորոշումն է, որ տալիս են Խորեն Աբրահամյանի հետ այս կամ այն կերպ առնչություն ունեցած մարդիկ։ Իրենք` արվեստասերներն էլ նրան անվանում էին «Բեմի թագավոր»։

«Համլետ» ֆիլմում Աբրահամյանի հնչեղ ձայնը լսելուց հետո Ինոկենտի Սմակտունովսկին ասել է. «Ավելի լավ էր, քան իմ խաղացածը»։ Մինչ այսօր Համլետի փայլուն մեկնաբանություններ են արել Պետրոս Ադամյանը, Վահրամ Փափազյանը, Ինոկենտի Սմակտունովսկին, Խորեն Աբրահամյանն ու Մել Գիբսոնը։

Աբրահամյանի դեբյուտը կինոյում 1949 թվականին էր «Արարատյան դաշտի աղջիկը» ֆիլմում խաղացած գյուղացու դերով։ Սակայն նրա կարիերայում շռնդալից հաջողություն գրանցվեց «Առաջին սիրո երգը» ֆիլմի առաջին իսկ ցուցադրությունից հետո։ Հայաստանի գրեթե բոլոր աղջիկները սիրահարվեցին Խորեն Աբրահամյանի մարմնավորած Արսենին։

Իրեն խորեն Աբրահամյանի աշակերտներից մեկը համարող Արմեն Մարությանը մի առիթով ասել է, որ Խորեն Աբրահամյանը, Մետաքսյա Սիմոնյանն ու Մհեր Մկրտչյանն անգնահատելի էին հայկական թատրոնում և կինոյում։

«Այս երեքի մասին ահա, թե ինչ կասեմ. ոսկու հանքը որ փորում են, հող են հանում, հետո այդ հողը լվանում են, միջից դուրս է գալիս ոսկին: Մեկ էլ հանկարծ՝ այդ հողի միջից մեծ կտորներ են դուրս գալիս, որոնց ասում են՝ самородок, իրենք հենց այդ էին»,- ասել է Մարությանը:

Կյանքի վերջին տարիներին Խորեն Աբրահամյանը մեկնում է Միացյալ Նահանգներ, որտեղ ձայնագրում է հայտնի «Ես իմ անուշ Հայաստանի» բանաստեղծությունը։ Սա հայրենիքից հեռացած Խորեն Աբրահամյանի հոգու պոռթկումն էր։ Աբրահամյանին Հայաստան է «վերադարձնում» Վազգեն Սարգսյանը։ Մահվանից մեկ շաբաթ առաջ նա բեմադրում է իր վերջին` «Ջին խաղը» ներկայացումը։

Մասնագիտական կրթությունը ստացել է Երևանի թատերական ինստիտուտում, որի դերասանական ֆակուլտետն ավարտել է 1951թ. և ընդունվել Գաբրիել Սունդուկյանի անվան դրամատիկական թատրոնը, որտեղ կատարել է բազմաթիվ դերեր (Ռոմեո, Պեպո, Օթելլո, Արա Գեղեցիկ, Արշակ թագավոր, Կորիոլան, Մյասնիկյան, Գայ, Ռաֆո Ավետյան և այլն)։

Նրա դերակատարմամբ առավել հայտնի ֆիլմերն են «Սարոյան եղբայրները», «Մենք ենք, մեր սարերը», «Առաջին սիրո երգը»։

 

 

Գլխավոր թեմաներ