ԵՐԵՎԱՆ, 11 ապրիլի — Sputnik. Վալենսիա քաղաքի հիվանդանոցներից մեկում երկարատև հիվանդությունից հետո մահացել է հայտնի ռեժիսոր-պրոդյուսեր Սուրեն Թադևոսյանը:
Ըստ հաղորդման` Թադևսոյանի հոգեհանգիստը տեղի կունենա Երևանում: Արարողության տեղի և ժամի մասին առայժմ տեղեկություն չկա:
Սուրեն Թադևոսյանը հեղինակել է 16 հեռուստանախագիծ, 2 հեռուստասերիալ: 2004-05թթ. եղել է «Դար 21» հեռուստաընկերության գլխավոր ռեժիսորը, 2007-11թթ.` «TV 5»-ի գլխավոր պրոդյուսերը և փոխտնօրենը: Եղել է «Արմատ» երաժշտական նախագծի և երգիչ Նարեկ Բավեյանի պրոդյուսերը: Նկարահանել է ավելի քան 80 երաժշտական, 100 գովազդային տեսահոլովակ: ԱՄՆ-ի «Գոլդեն Սթար» երաժշտական մրցանակաբաշխության ժամանակ Արսեն Սաֆարյանի «Հուշերի քաղաք» տեսահոլովակի համար արժանացել է «Տարվա լավագույն տեսահոլովակ» մրցանակին, իսկ 2010թ.` «Տարվա լավագույն ռեժիսոր» մրցանակի: 2011թ. Իսպանիայի Բիլբաո քաղաքի կինոփառատոնի ժամանակ արժանացել է «Լավագույն կարճամետրաժ ֆիլմի սցենար» մրցանակին: