ԵՐԵՎԱՆ, 12 ապրիլի — Sputnik. Արծվիկ Մինասյանը վստահեցրեց, որ այս հարցը նրա իրավասությունից դուրս է։ Նրա խոսքով` գործող կարգավորումների ներքո նման իրավասությունը վերապահված է հանրային ծառայությունները կարգավորող մարմնին, որը կարող է գազի գնի փոփոխման հարցով սեփական նախաձեռնությամբ կամ դիմումի հիման վրա վարույթ հարուցել, որը կներկայացնի համապատասխան օպերատորը։
«Այս պահին ինձ հայտնի չէ, որ վերանայման հայտ է ներկայացվել»,- ասաց Արծվիկ Մինասյանը։
Նա ավելացրեց, որ մնացել է իր հին տեսակետին, այն է` պետք է գազի գնի մասով Ռուսաստանի հետ անցում կատարել միարժութային վճարման համակարգի, որ հնարավոր լինի մի կողմից չեզոքացնել արտարժույթի ռիսկը, մյուս կողմից էականորեն կապակցել գների աճը բացառապես ռուսական ներքին շուկայում այս նույն հումքի գների հետ։
«Սա նշանակում է նաև վերանայել համաձայնագիրը։ Դուք գիտեք, որ հանրապետության վարչապետը հնչեցրել է առաջարկը, որ անցում կատարվի ռուբլով վճարման համակարգի։ Ցավում եմ, որ այս պահին չունենք լիարժեք պատասխան մյուս կողմից, նաև ԵՏՄ երկրներից»,-ասաց նախարարը։
Ի վերջո, նախարարը կարծում է, որ չնայած գազի գնի տատանումներին ու հայկական կողմի բանակցություններին, զուգահեռ պետք է այլընտրանքային էներգիայի աղբյուրներ որոնել ։
Հիշեցնենք, որ Ռուսաստանի վարչապետ Դմիտրի Մեդվեդևի այցի ընթացքում ստորագրվեց պայմանագիր, որով Հայաստան մատակարարվող ռուսական գազի մեկ խորանարդ մետրի սակագինը սահմանին ներկայիս 165 դոլարի փոխարեն կնվազեցվի մինչև 150 դոլար։
