ԵՐԵՎԱՆ, 15 ապրիլի — Sputnik. Համերգի ընթացքում կհնչեն ինչպես եվրոպացի կոմպոզիտորների, այնպես էլ Կոմիտասի ստեղծագործությունները:
Էստոնական ազգային արական երգչախումբը (Eesti Rahvusmeeskoor, հայտնի նաև որպես RAM) հիմնադրվել է 1944թ.-ին դիրիժոր Գուստավ Էռնեսաքսի կողմից։ Երգչախումբը, որը սկզբնապես երգում էր a cappella, այժմ համաշխարհային համբավ ունեցող պրոֆեսիոնալ համույթ է` հայտնի կատարվող երգչախմբային ստեղծագործությունների լայն ծավալով:
Երգչախումբը պարբերաբար ձայնագրվում է հեռուստառադիոընկերությունների համար, համագործակցել է «Դոյչե գրամոֆոն», «Սանի», «Ֆինլանդիա» և այլ հայտնի ընկերությունների հետ։ Վերջին հինգ տարիների ընթացքում երգչախումբը թողարկել է 3 ալբոմ, որոնցից վերջինը՝ «Դրախտում» (Գալինա Գրիգորևայի երաժշտությամբ), արժանացել է պատվավոր մրցանակի և ճանաչվել 2014թ. լավագույն դասական ալբոմ։
2004թ. RAM-ն արժանացել է «Գրեմմի» մրցանակի` խմբերգային երաժշտության կատեգորիայում` Սիբելիուսի «Cantatas (Virgin Classics)» ձայնասկավառակի ձայնագրության համար։
Երգչախմբի ձայնագրած Էդվարդ Գրիգի «Պեր Գյունտի» ալբոմը 2005թ.-ին Բի Բի Սի-ի «Մյուզիք մագազինի» կողմից ճանաչվել է նվագախմբային երաժշտության լավագույն ալբոմ։
Էստոնական ազգային արական երգչախումբը հանդես է եկել ավելի քան 6300 համերգով Էստոնիայում և այլ երկրներում։