ԵՐԵՎԱՆ, 15 ապրիլի — Sputnik. ՀՀ կառավարությունը որոշեց արագացնել Ռուսաստանից 200 մլն դոլարի ռազմական արտադրանք գնելու գործընթացը, որի մասին շուրջ մեկ տարի առաջ կնքված համաձայնագիրը մինչ օրս մնացել է թղթի վրա։
Խոսքը ՀՀ և ՌԴ կառավարությունների միջև 2015 թվականի հունիսի 26-ին Երևանում ստորագրված ՀՀ կառավարությանը պետական արտահանման վարկ տրամադրելու համաձայնագրի մասին է, որի անհրաժեշտությունն առավել ակնհայտ դարձավ ապրիլի սկզբին ԼՂ շփման գծում ադրբեջանական կողմի սանձազերծած քառօրյա պատերազմի ընթացքում:
Ապրիլի 7-ին Երևանում ՌԴ վարչապետ Դմիտրի Մեդվեդևի հետ հանդիպման ժամանակ ՀՀ վարչապետ Հովիկ Աբրահամյանն առաջարկել էր «Ռոսօբորոնէքսպորտ» ընկերությանը հրահանգել` արագացնել Հայաստանին սպառազինության մատակարարման մասին պայմանագրի ստորագրումը:
Իսկ ապրիլի 15-ի նիստում ՀՀ կառավարությունը պաշտպանության նախարար Սեյրան Օհանյանի առաջարկով պայմանագրի ստորագրումն արագացնելու մասին սեփական որոշումը կայացրեց, որով ՀՀ ֆինանսների նախարարին հանձնարարվում է հսկողություն իրականացնել հայկական կողմի ստանձնած պարտավորությունների կատարման նկատմամբ, պաշտպանության նախարարին՝ հստակեցնել Հայաստանին մատակարարվող սպառազինության և ռազմական տեխնիկայի ցանկը և ՌԴ համապատասխան մարմինների, այդ թվում՝ «ՌոսՕբորոնԷքսպորտ» ընկերության հետ քննարկել և ստորագրել մատակարարման պայմանագրերը՝ դրանցում արտացոլելով մատակարարումների ծավալները, ժամկետներն ու գները:
Կենտրոնական բանկի նախագահին էլ հանձնարարվում է մինչև 2016 թվականի ապրիլի 29-ը ՌԴ «Վնեշէկոնոմբանկի» հետ համաձայնեցնել համաձայնագրի ֆինանսական հարցերը:
ՀՀ և ՌԴ կառավարությունների միջև 2015 թվականի հունիսի 26-ին Երևանում ստորագրված ՀՀ կառավարությանը պետական արտահանման վարկ տրամադրելու մասին համաձայնագրով ռուսական կողմը պարտավորվել էր հայկական կողմին տրամադրել 200 մլն ԱՄՆ դոլարի վարկ, որը պետք է օգտագործվեր բացառապես ռուսական արտադրության ռազմական նշանակության արտադրանք ձեռք բերելու նպատակով: Ռազմական նշանակության արտադրանքի ցանկը համաձայնագրում գաղտնի է:
Ռուսական կողմը համաձայնագրով նախատեսված ռազմական արտադրանքի մատակարարումը պետք է իրականացներ 2015-2017թթ. ընթացքում, իսկ հայկական կողմը 2018թ. —ից սկսած տարեկան 2 անգամ` փետրվարի 15-ին և օգոստոսի 15-ին, պետք է մարեր վարկի մայր գումարն ու դրանից հաշվարկված տոկոսները` տարեկան 3 տոկոս տոկոսադրույքով: Ի դեպ, այս համաձայնագրի իրավական հիմքը դեռևս 2003թ. հունվարի 17-ին և 2013թ. հունիսի 25-ին երկու երկրների կառավարությունների միջև կնքված «ռազմատեխնիկական համագործակցության մասին» համաձայնագրերն են:
