ԵՐԵՎԱՆ, 15 ապրիլի — Sputnik. Գյումրիում տեղի ունեցած Ավետիսյանների ընտանիքի սպանության գործով դատական հերթական նիստի ժամանակ Վալերի Պերմյակովը հրաժարվեց ցուցմունք տալ դատարանում, Գյումրիից հաղորդեց Spuntik Արմենիայի թղթակիցը։
Դատարանում մեղադրյալին հարցեր ուղղեց հանրային պաշտպան Էդուարդ Աղաջանյանը։ Հարցին, թե Պերմյակովն ինչպես է իրեն զգում, նա պատասխանեց` լավ։
Հարցին, թե Ձեզ կաշկանդված զգու՞մ եք, նա պատասխանեց` ոչ։ Իսկ մյուս հարցին` «Ինչ-որ մեկը Ձեզ վախեցրել կամ ահաբեկե՞լ է», նա պատասխանեց` ոչ։
«Դու՞ք եք մտել Ավետիսյանների բնակարան» հարցին Պերմյակովը տվեց դրական պատասխան։
Սակայն դատապաշտպանի այն հարցին, թե Պերմյակո՞վն է ավազակային հարձակման համար սպանել Ավետիսյաններին, նա հրաժարվեց պատասխանել։
Նա նաև չպատասխանեց այն հարցին` մենակ է եղել, թե ոչ։
Ըստ այդ ցուցմունքներիի` Պերմյակովն Ավետիսյանների տուն է մտել ջուր խմելու։ Երբ խմել է ու ցանկացել է դուրս գալ, արթնացել է Աիդան, վերցրել է հեռախոսն ու ասել, որ զանգում է ոստիկանություն։ Այդ ժամանակ Պերմյակովը կրակել է նրա վրա, «հետո ամեն ինչ ստացվեց ինքնաբերաբար»։ Հարցին, թե քա՞նի հոգու վրա է կրակել, նա պատասխանել է` վեց, իսկ երեխային հարվածել է սվին-դանակով։ Ցուցումնքներում նա նաև նշել է, որ այդ ամենն արել է առանց նման նպատակ ունենալու, դա ինքնաբերաբար է ստացվել։ Իսկ հարցին, թե նա զղջու՞մ է արածի համար, նա պատասխանել է` այո։
Դատական նիստը շարունակվում է։
Գյումրիում, որտեղ տեղակայված է 102-րդ ռուսական ռազմակայանը, 2015 թվականի հունվարի 12-ին սպանվել էր մի ամբողջ ընտանիք, մեկուկես տարեկան երեխան մահացել էր մեկ շաբաթ անց հիվանդանոցում։ Հանցագործության կասկածանքով նույն օրը ձերբակալվել էր ռուս պայմանագրային զինծառայող Վալերի Պերմյակովը: Նա փորձել էր անցնել Թուրքիայի տարածք, և ռուս սահմանապահները նրան հայտնաբերել էին հենց սահմանին: Զենք հափշտակելու և դասալքության համար 2015 թվականի օգոստոսի 12-ին Գյումրիում դատարանը Պերմյակովին դատապարտել է 10 տարի ազատազրկման։ Սպանության մասին գործը հանձնվել է հայկական կողմին և քննվում է առանձին, առաջին նիստը տեղի էր ունեցել դեկտեմբերի 18-ին։
