ԵՐԵՎԱՆ, 15 ապրիլի-Sputnik. Ադրբեջանն ու Թուրքիան նպատակ ունեն Հայաստանին ու Ռուսաստանին հեռացնել միմյանցից, Sputnik Արմենիա ռադիոկայանի եթերում կարծիք հայտնեց Արամ Սաֆարյանը։
«Այն, որ 25 տարի դա նրանց չի հաջողվել, չի նշանակում, որ այդ երկու պետությունները հրաժարվել են իրենց մտքից։ Նրանք միշտ դաշնակիցներ են փնտրել, որոնց միջոցով կարող են Հայաստանին վնաս հասցնել` ցանկացած տիպի վնաս»- նշեց նա։
Նրա խոսքով`այնինչ եթե հանկարծ նրանց հաջողվի Հայաստանը Ռուսաստանից մեկուսացնել, ապա հաջորդ քայլը կլինի «ջախջախիչ» հարվածը Լեռնային Ղարաբաղի ուղղությամբ։
Այն հարցին, թե արդյո՞ք Հայաստանում առկա է հակառուսական տրամադրություն, Սաֆարյանը բացասաբար պատասխանեց։
«Ես ընդամենը արձանագրում եմ, որ որոշ ուժեր, որոնք ուզում են իրենց ցույց տալ քաղաքական դաշտում որպես ինքնուրույն, անկախ, անաչառ, Հայաստանում գցեցին այս ցեցը։ Հասարակության մեծ մասը լավ է հասկանում իրավիճակը և թույլ չի տա, որ իրեն քաշեն այդ ճահճի մեջ»,-ընդգծեց նա։
Նրա խոսքով` Թուրքիան Ադրբեջանին ամեն տեսակ աջակցություն ցուցաբերում է, բացի մեկից` նա երբեք ուղղակի կերպով հարձակում չի իրականացնի Հայաստանի վրա։
«Պատճառն այն է, որ հայ-ռուսական համատեղ ուժերը վերահսկում են իրավիճակը Հայաստանում և զսպում Թուրքիային»,-ասաց Սաֆարյանը։
Ինչ վերաբերում է զենքի վաճառքի մասին քննարկումներին, ապա Սաֆարյանը նշեց, որ այստեղ Ռուսաստանի խնդիրը չէ. այդ զենքը գալիս է Իսրայելից և Թուրքիայից։
Նրա խոսքով` Հայաստանը պետք է կարողանա գտնել այդ զենքի դեմ «հակաթույնը» և ունենա ժամանակին համապատասխան զենք։
Սաֆարյանը հավելեց, որ անօդաչու թռչող սարքերն իրենցից մեծ վտանգ են ներկայացնում, ուստի հայկական կողմը պետք է նախաձեռնի այդ հարցով լուծումներ գտնելու գործընթացը։