ԵՐԵՎԱՆ, 6 մայիսի — Sputnik. Sputnik Արմենիան երիտասարդական հասարակական կազմակերպությունների հետ մասնակցում է «Հիշու՛մ եմ։ Հպարտանու՛մ եմ» ակցիային, որը նպաստում է Հայաստանի և Ռուսաստանի կապերի ամրապնդմանը։
Ակցիան մեկնարկել է Երևանի Ազատության հրապարակից։ Այն ընթանում է «Պապի հաղթանակն իմ հաղթանակն է», «Կապիր, եթե հիշում ես», «Հիշու՛մ եմ։ Հպարտանու՛մ եմ», «Շնորհակալություն հաղթանակի համար» կարգախոսներով։
Ակցիայի կազմակերպիչը «Ռուս-հայկական երիտասարդական միասնություն» (ՌՀԵՄ) հասարակական կազմակերպությունն է։ Միջոցառմանը մասնակցել են նաև Հայաստանի երիտասարդական և վետերանային կազմակերպությունների ներկայացուցիչները։
«Այս տարի ակցիան ավելի զանգվածային բնույթ է կրում, ՌՀԵՄ-ի ութ մասնաճյուղ է մասնակցում։ Ակցիան մեկնարկել է մայիսի սկզբին Երևանում, հետո շարունակվել է Գյումրիում, Վանաձորում, Ստեփանավանում, Դիլիջանում, Սպիտակում, Գորիսում, Ալավերդիում և Էջմիածնում։ Եվ այդպես մինչև մայիսի 9-ը ներառյալ»,- նշեց ՌՀԵՄ-ի նախագահ Գոհար Գումաշյանը։
Ակցիայի շրջանակում ակտիվիստներն անցորդներին և վարորդներին բաժանում են Գեորգիևյան ժապավեններ, ինչպես նաև «Հիշու՛մ եմ։ Հպարտանու՛մ եմ», «Շնորհակալություն հաղթանակի համար» գրություններով պիտակներ` ավտոմեքենաների ապակիներին կպցնելու համար։
Գեորգիևյան ժապավենը տեսքով և գույների համադրությամբ համապատասխանում է այն ժապավենին, որն առկա է «1941-1945թթ. Հայրենական մեծ պատերազմում Գերմանիայի նկատմամբ հաղթանակի համար» շքանշանի շերտաձողիկի վրա։ Հենց այդ պատճառով էլ Գեորգիևյան ժապավենը XXI դարի սկզբում դարձել է ֆաշիզմի դեմ տարած հաղթանակի խորհրդանիշը։
