ԵՐԵՎԱՆ, 27 սեպտեմբերի — Sputnik. ԱԺ-ն այսօր արտահերթ նիստում քննարկեց «Համայնքների ֆինանսական համահարթեցման մասին» օրենքի` կառավարության ներկայացրած նախագիծը:
Օրինագիծը ներկայացնելով, տարածքային կառավարման եւ զարգացման փոխնախարար Վաչե Տերտերյանը նշեց, որ առաջարկվում է պետության կողմից տրամադրվող դոտացիաներն առավել համաչափ բաշխել հայաստանյան համայնքների միջեւ:
Եթե նախկինում օրենքը դոտացիա բաշխելիս հաշվի էր առնում բնակչության թիվն ու եկամուտները, ապա առաջարկվող փոփոխությամբ նախատեսվում է իբրև չափորոշիչ ընդունել համայնքի տեղը`բարձրադիր լինելը:
Ընդդիմությանը, սակայն, կառավարության ներկայացուցչի մեկնաբանությունը չբավարարեց: Նրանց համոզմամբ, օրինագիծն իրականում ոչ թե սոցիալ-տնտեսական, այլ քաղաքական խնդիր է լուծում:
«Դուք քաղաքական հարց եք լուծում, դուք ստեղծում եք ստաբիլ կախվածություն և այդ կախվածությունը ստեղծելուց հետո գալիս ասում եք՝ հիմա Երևանից էլ կհամահարթեցնենք: Մենք էլ ենք ասում՝ կարելի է համահարթեցնել, բայց ինչո՞ւ չի կարելի նրանց 75 տոկոս տալ»,- ասաց Հրանտ Բագրատյանը:
Նա, ի դեպ, առաջարկում է համայնքներում հավաքված եկամտահարկի ու շահութահարկի 75 տոկոսը թողնել համայնքային բյուջեում, ոչ թե փոխանցել Երևան, ապա դոտացիայի տեսքով հետ ուղարկել համայնք:
Հրանտ Բագրատյանը կառավարության ներկայացրած օրինագիծը որակում է իբրև տեղական ինքնակառավարման կայացմանը խոչըդոտող լուրջ քայլ:
Նուն կարծիքը հայտնեց նաև ՕԵԿ խմբակցության ղեկավար Հեղինե Բիշարյանը:
«Սրանով մենք էլ ավելի ենք խորացնելու այն լրջագույն կախվածությունը, որը մինչ այսօր տեսել ենք, տեսնում ենք, ու դա շարունակվելու է»,- ասաց նա:
Հեղինե Բիշարյանն իր ելույթում անդրադարձավ նաև նոր կառավարության գործելաոճի վերաբերյալ հնչող դրական կարծիքներին՝ նշելով, որ այն կառավարությունը, որը պետք է նոր որակներ բերի պետական կառավարման մեջ, ներկայացրել է մի օրենքի նախագիծ, որը հակասում է այդ սապսումներին:
ԱԺ պատգամավոր Թևան Պողոսյանը ևս համահարթեցման նախագծի մասին իր ելույթում անդրադարձավ նոր կառավարության գործունեության հարցին, մասնավորապես, ասելով. «Կառավարույունը հայտարարում է համակարգային փոփոխություններ, բայց մենք հինն ենք շարունակում, որ բոլոր համայնքների ղեկավարները կախվածություն ունենան իշխող կուսակցությունից»:
Նոր կառավարության մասին պատգամավորների հայտարարություններին արձագանքեց նիստը վարող ԱԺ փոխնախագահ Էդուարդ Շարմազանովը:
«Փոփոխությունները, բարեփոխումները և հեղափոխությունը տարբեր բաներ են: Մենք բարեփոխումների փուլում ենք և ոչ թե սեպտեմբերյան հեղափոխություն ենք անում: Հայաստանում սեպտեմբերյան հեղափոխություն տեղի չի ունեցել»,- ասաց Շարմազանովը՝ հավելելով, որ թե՛ հնի, և թե՛ նորի պատասխանատուն ՀՀԿ-ն է, որն ինչպես հին, այնպես էլ նոր կառավարության պատասխանատուն է:
Ինչ վերաբերում է նախկին կառավարություններին, ԱԺ փոխոսնակը հայտարարեց, որ դրանք վատ չեն աշխատել:
