12:57 18 օգոստոսի 2017
Ուղիղ եթեր
Հայկական դրամ

Բանակին փոխանցվող 1000 դրամներն ապահովագրական համակարգ են

© Sputnik/ Aram Nersesyan
Հայաստան
Ստանալ կարճ հղումը
54 0 0

ՀՀ ֆինանսների նախարարն անդրադարձել է աշխատավարձերից՝ հանուն բանակի ամսական 1000 դրամ գանձելու նախաձեռնությանը և նշել, որ բանակին փոխանցվող այդ գումարներն ապահովագրական համակարգ են:

ԵՐԵՎԱՆ, 14 նոյեմբերի — Sputnik. ՀՀ ֆինանսների նախարար Վարդան Արամյանը, անդրադառնալով մարտական գործողություների ժամանակ զոհված կամ վիրավորված զինծառայողներին աջակցելու նպատակով աշխատավարձերից ամսական 1000 դրամ պահում կատարելու` կառավարության նախաձեռնությանը, նշեց` բանակի նկատմամբ պատասխանատվությունը բոլորիս պատասխանատվությունն է։

«Ուզենք, թե չուզենք, մենք պետք է հաշվի առնենք, որ ապրում ենք կիսապատերազմական իրավիճակում, հետևաբար պետք է ազգովի մտածենք, և դա մեր բոլորի պարտականությունն է, որպեսզի բանակն ունենա հենարան»,- ասաց նախարարը:

Ինչ վերաբերում է առաջարկվող համակարգին, Վարդան Արամյանն այն համեմատեց ապահովագրական համակարգի հետ:

«Եթե որևիցե զինծառայող իր պարտականությունները կատարելու ժամանակ մահանա կամ դառնա հաշմանդամ, նշանակում է, որ նրա ընտանիքը զրկվում է ապագա երաշխիքներից, քանի որ այդ զինծառայողը ապագայում պիտի դառնար իր ընտանիքի հիմնական կերակրողը: Հետևաբար պետք է լինի մի համակարգ, որն առաջիկա 20 տարիներին կփոխհատուցի այդ ընտանիքների կորցրած ապագայի փոխարեն»,- ասաց Վարդան Արամյանը՝ միաժամանակ ավելացնելով, որ կառավարությունն այս ծրագրում ավելի մեծ ներդրումներ է ակնկալում այլ աղբյուրներից:

Անդրադառնալով քննադատություններին, թե եթե կառավարությունը ձգտում է օգնել զինծառայողների ընտանիքներին, պետք է նախ բացահայտի ստվերը, ապա ստվերից դուրս բերված գումարներն ուղղի այդ նպատակին, Վարդան Արամյանը նշեց, որ համաձայն է այս տեսակետի հետ, բայց դա հստակ և կայուն եկամուտներ չի ենթադրում: Վարդան Արամյանը համաձայն է նաև հասարակության վստահությունը վերականգնելու գաղափարին, բայց խորհուրդ է տալիս առաջարկված ծրագիրը դրա հետ չխառնել:

«Ես կարծում եմ` դրական է այս գաղափարախոսությունը։ Յուրաքանչյուր լավ համակարգ, եթե ծանրաբեռնեք ձեր ասած այդ խնդիրներով, մենք երբեք առաջ չենք շարժվի»,- ասաց նախարարը:

Իսկ ինչ վերաբերում է բանակի գեներալների ու ղեկավար կազմի ապօրինի հարստացած ներկայացուցիչների մասին հանրությանը հուզող տեղեկություններին, Վարդան Արամյանը խորհուրդ տվեց կոնկրետ հաղորդումներով դիմել իրավապահներին: Իսկ որպես ֆինանսների նախարար խոստացավ իր իրավասության տիրույթում նման տեղեկություններ հայտնվելու դեպքում միջոցներ ձեռնարկել:

Գլխավոր թեմաներ