13:53 20 օգոստոսի 2017
Ուղիղ եթեր
Վիգեն Սարգսյան

Զինծառայողների ընտանիքների աջակցության հիմնադրամի գումարները կծառայեն իրենց նպատակին

© Sputnik/ Asatur Yesayants
Հայաստան
Ստանալ կարճ հղումը
45 0 0

Զոհված և վիրավորված զինծառայողների համար ստեղծվող ապահովագրական հիմնադրամի գումարները կծախսվեն միայն նշված նպատակներով, հայտնեց ՀՀ պաշտպանության նախարար Վիգեն Սարգսյանը։

ԵՐԵՎԱՆ, 14 նոյեմբերի — Sputnik. Հիմնադրամի հոգաբարձուների խորհրդի անդամները կհետևեն գումարներն արդյունավետ ծախսելու գործընթացին։ Այս մասին հայտնեց Հայաստանի պաշտպանության նախարար Վիգեն Սարգսյանը` խորհրդարանում ներկայացնելով «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրինագիծը։

«Ես խորապես համոզված եմ, որ սա ոչ թե սոցիալական աջակցության ծրագիր է, այլ` պաշտպանության ապահովման քաղաքականություն։ Սոցիալական նպաստի խնդիր չենք լուծում, այլ որպես քաղաքացիներ ասում ենք՝ այն մարդկանց, ովքեր իրենց ծառայությունն են բերում ԶՈւ-երում որպես ժամկետային, պայմանագրային զինծառայող, որպես սպա և որպես կամավոր, իրենց կյանքն են վտանգում, և հաճախ հնչում է այդ հարցը՝ ինչ կլինի, եթե այդ բանը պատահի», — ասաց Սարգսյանը։

Նրա խոսքով` օրինագիծը պետք է վերաբերի բոլոր զոհվածներին և վիրավորվածներին և ոչ թե միայն նրանց, որոնց հարազատները զոհվել կամ հաշմանդամ են դարձել 2017 թվականի հունվարից հետո։ Սարգսյանն ընդգծեց` հիմնադրամի միջոցներն այլ նպատակների չեն ուղղվելու։

Նրա կարևոր համարեց նաև հոգաբարձուների խորհրդի կառուցվածքը՝ հայտարարելով, որ 3 ներկայացուցիչ է ընտրված լինելու կառավարության կողմից, երեք՝ կենտրոնական բանկի և երեք՝ քաղաքացիական հասարակության: Նախարարն առաջարկեց մեկ կամ երկու տեղ տրամադրել ընդդիմադիր կուսակցությունների ներկայացուցիչներին։

ՀՀ կառավարությունը հանդես է եկել առաջարկով, որի համաձայն` երկրի յուրաքանչյուր աշխատող քաղաքացու աշխատավարձից ամսական 1000 դրամ պետք է փոխանցվի բանակի կարիքներին։

Հայրենիքի պաշտպանության ժամանակ կյանքը զոհված և առողջությունը վնասած զինծառայողներին և նրանց ընտանիքիներին հատուցելու համար կառավարությունը կներդնի նոր համակարգ: Դրա հիմնասյունը լինելու է հատուկ հիմնադրամը, որի միջոցները ձևավորվելու են նվիրատվություններից, փոխառություններից, դրամաշնորհային գումարներից, հիմնադրամի սկզբնական միջոցներից, նաև յուրաքանչյուր աշխատող քաղաքացու աշխատավարձից պարտադիր գանձվող 1000 դրամ գումարից:

Զոհվածների և 1-ին խմբի հաշմանդամություն ստացած զինծառայողների ընտանիքները միանվագ կստանան 10 մլն դրամ, 2-րդ խմբի հաշմանդամները՝ 5 մլն, իսկ հետագայում՝ 20 տարվա ընթացքում, կստանան ամսական 300 հազար դրամ: Սպաների համար այդ գումարը կկազմի ամսական 300 հազար դրամ, ենթասպաների համար՝ 250 հազար դրամ, շարքայինների համար՝ 100 հազար դրամ: Այսինքն, սպային կամ նրա ընտանիքին 20 տարվա ընթացքում կհատկացվի 82 մլն դրամ, ենթասպաներին՝ 70 մլն, շարքայիններին՝ 58 մլն։

II խմբի հաշմանդամություն ստացած զինծառայողներն ամսական կստանան 200 հազար դրամ, 150 և 100 հազար դրամ համապատասխանաբար։ Դրամական միջոցները կստանան զինծառայողների ծնողներն ու երեխաները, ինչպես նաև մինչև 23 տարեկան եղբայրներն ու քույրերը։

 

Գլխավոր թեմաներ