ԵՐԵՎԱՆ, 16 նոյեմբերի — Sputnik. ՊՊԾ գունդը գրաված «Սասնա ծռեր» զինված խմբավորման անդամ Արմեն Բիլյանին ոստիկանին սպանելու մեղադրանք է առաջադրվել։
«Մեղադրանքն առաջադրվել է 104-րդ հոդվածով (սպանություն)։ Բիլյանը մեղադրվում է ոստիկան Գագիկ Մկրտչյանի սպանության մեջ։ Սակայն մենք մտադիր ենք ապացուցել, որ Բիլյանը կապ չունի սպանության հետ», — լրագրողներին ասաց փաստաբան Արմինե Ֆանյանը։
Ֆանյանը նշել է, որ իր պաշտպանյալն իրեն մեղավոր չի ճանաչում։ 25-ամյա ոստիկան Գագիկ Մկրտչյանը վիրավորվել էր հուլիսի 17-ին ՊՊԾ գնդի շենքը գրավելու ժամանակ, մահացել էր օգոստոսի 13-ին հիվանդանոցում։
Ավելի վաղ ոստիկանի սպանության մեջ մեղադրվել էր նաև «Սասնա ծռերի» մեկ այլ անդամ` Սմբատ Բարսեղյանը։
Հիշեցնենք, որ 31 հոգանոց զինված խումբը հուլիսի 17-ի առավոտյան ներխուժել էր Էրեբունի և Երևան վարչական տարածքների ոստիկանության ՊՊԾ գնդի տարածք։ Հուլիսի 31-ի երեկոյան գնդի տարածքում գտնվողները վայր դրեցին զենքն ու հանձնվեցին իշխանությանը։
