22:44 22 օգոստոսի 2017
Ուղիղ եթեր
Արևային էներգիա

Էներգետիկան էժանանում է, սակագները՝ դեռ ոչ

© Айк Арутюнян
Հայաստան
Ստանալ կարճ հղումը
206 0 0

Մինչև 2020 թ.-ը ՀՀ կառավարությունը նախատեսում է էներգետիկ ծախսերը կրճատել 38 տոկոսով: Այդ մասին այսօր հայտնել է ՀՀ էներգետիկայի և բնական պաշարների փոխնախարար Հայկ Հարությունյանը:

ԵՐԵՎԱՆ, 23 նոյեմբերի — Sputnik. Կգա մի ժամանակ, երբ Հայաստանի տարածքն ինքնաթիռի պատուհանից նայելիս, բոլոր տանիքների վրա արևային պանելներ կերևան: ՀՀ էներգետիկայի փոխնախարար Հայկ Հարությունյանի խոսքով, Հայաստանի էներգետիկ ոլորտի ապագան նախարարությունում այդպես են պատկերացնում:

«Մենք ուզում ենք ստեղծել արտադրություն սպառման կետում, և դրա լավագույն տարբերակը արևային էներգետիկայի զարգացումն է»,- ասաց փոխնախարարը,- «հիմա արդեն բոլորը կարող են դիմել ՀԾԿՀ՝ կառուցել արևային կայան, ստանալ սակագին, և պետությունը պարտավոր կլինի 20 տարի այդ էլեկտրաէներգիան գնել»:

Հայկ Հարությունյանը չթաքցրեց, որ ինքն էլ մեկն է առայժմ սակավաթիվ այն քաղաքացիներից, որոնք իրենց տան տանիքում արևային կայան են տեղադրել, և արդեն 2 ամիս է՝ ինքնուրույն է արտադրում իր սպառած էլեկտրաէներգիան:

«Դիմել եմ լիզինգի, լիզինգով բերել, տեղադրել են: Սկզբնական ոչ մի ներդրում չի պահանջվում, և այն գումարը, որ ես ամեն ամիս պետք է վճարեի հոսանքի համար, հիմա վճարում եմ լիզինգի դիմաց»,- ասաց նա:

Հայկ Հարությունյանը սեփական փորձով նշեց նաև, որ եթե արտադրված արևային էլեկտրաէներգիան ամբողջությամբ չի սպառվում, ՀԷՑ-ը գնում է ավելցուկն ու հարկ եղած դեպքում վերադարձնում արտադրող-սպառողին:

Հետագայում, դեպի Իրան և Վրաստան էլեկտրագծերի շահագործումից հետո, Հայաստանում արտադրված ավելցուկային էլեկտրաէներգիան կարող է արտահանվել նաև այդ երկրներ:
Արևային էներգետիկայի զարգացման նպատակով, հաջորդ տարի նախարարությունը նախատեսում է անցկացնել նաև միջազգային խոշոր մրցույթ՝ 50 մգվտ հզորությամբ արևային կայան կառուցելու համար:

Մրցույթում հաղթելու առաջին և ամենակարևոր նախապայմանը ցածր սակագինն է: Հողմային էներգետիկայի բնագավառում ևս նախատեսվում են միջազգային ներդրումային ծրագրեր:

«Ունենք ներդրողներ Իրանից, Իտալիայից, Չինաստանից, Իսպանիայից, Վրաստանից: Աշխատում ենք բոլորի հետ: Այնքան շատ քամու ռեսուրս ունենք, որ բոլորին էլ կբավարարի»,- ասաց Հարությունյանը՝ հավելելով, որ ներկայում ներդրողները բարձրադիր լեռնային հատվածնեում քամու ուժի չափումներ են իրականացնում:

Ի դեպ, հողմային էներգետիկայի արտադրությունն այսօր աշխարհում նույնպես նվազման միտում ունի, ինչը նշանակում է, որ հողմային կայանների արտադրած էլեկտրաէներգիան ժամանակի ընթացքում էլ ավելի է էժանանալու:

Այդ բոլոր ներդրումներին զուգահեռ, կառավարությունն առաջարկում է նաև էներգախնայողության ազգային ծրագիր՝ շինարարական նորագույն մեթոդների և խնայողական լամպերի համատարած կիրառմամբ, որի արդյունքում մինչև 2020 թ.-ը նախատեսվում է շուրջ 38 տոկոսով կրճատել հանրապետության էներգետիկ ծախսերը:

Իսկ մինչ այդ, հայաստանցի սպառողները դեռ սպասում են էլեկտրաէներգիայի և գազի գործող սակագների խոստացված էժանացմանը: Էներգետիկայի և բնական պաշարների փոխնախարար Հայկ Հարությունյանը հայտնեց, որ նոր առաջարկվող սակագինն առայժմ հստակեցված չէ և խորհուրդ տվեց սպասել ՀԾԿՀ-ի որոշմանը:

Վրաստանի հետ էլ առայժմ հստակեցված չէ դեպի Հայաստան գազի փոխադրման տրազիտային նոր գինը, որից կախված գազի սակագինը կարող է նվազել նաև սպառողների համար:

Գլխավոր թեմաներ

  • Ծովակալ Իսակով

    …1941 թվականին Շլիսելբուրգի մերձակայքում նա կորցրեց ձախ ականջի լսողությունը, իսկ մեկ տարի անց Սոչիում անդամահատեցին նրա ոտքը` ազդրին հասցված բեկորային վիրավորման հետևանքով առաջացած փտախտի պատճառով։ Վիրահատությունից հետո երկու ժամ չէր շոշափվում զարկերակը, սակայն նա ողջ մնաց։

    6
  • Ծրագրավորող

    Հայաստանը, Բելառուսը, Մոլդովան, Ռուսաստանն ու Ուկրաինան աշխարհի ամենամեծ ՏՏ–շուկան են ձևավորել, որում ընդգրկված է 15 հազար մասնագետ և երկու հազար ընկերություն։ Այս եզրակացությանն են հանգել Yalantis ընկերության մասնագետները։

    12
  • Ատենախոսություն

    Հայաստանը գիտական գրագողությունների բացահայտմամբ նախկին ԽՍՀՄ–ում առաջին տեղում է։ Բացահայտվում են ոչ միայն Հայաստանում ու հայերենով, այլև արտերկրում այլ լեզուներով կատարված գրագողությունները, Sputnik Արմենիային հայտնեցին Բարձրագույն որակավորման հանձնաժողովից։

    32