ԵՐԵՎԱՆ, 23 նոյեմբերի — Sputnik. Արցախի շուրջ բանակցություններում առաջընթաց չկա, այսօր հայտարարել է ՀՀ արտաքին գործերի փոխնախարար Շավարշ Քոչարյանը, նշելով, որ հանդիպումները պետք է արդյունավետ լինեն հայկական կողմը միայն դա է ակնկալում Ադրբեջանի հետ հանդիպումից։
Փոխնախարարը հերքել է Ադրբեջանի այն հայտարարությունը, թե, իբր, հայկական կողմը խուսափում է բանակցություններից։
«Անհնար է ակնկալել առաջընթաց բանակցություններում, քանի դեռ կա պատերազմի վերսկսման սպառնալիք, քանի դեռ կողմերի միջև չկա վստահություն, քանի դեռ կրակում են և շփման գծում սադրանքներ են կազմակերպվում»,- ասել է Շավարշ Քոչարյանը:
Նա ներկա փուլում անհնարին է համարել առաջընթացի սպասելը, քանի որ դեռ չեն իրականացվել Վիեննայի և Սանկտ Պետերբուրգի պայմանավորվածությունները, նշելով, որ Վիեննայում քննարկված հետաքննության մեխանիզմների ներդրումը նորություն չէ, դա Ադրբեջանի միջազգային պարտավորվածությունն է դեռևս 1995 թվականից: