ԵՐԵՎԱՆ, 23 նոյեմբերի — Sputnik, Նելլի Դանիելյան. ՀՀ տնտեսական զարգացման և ներդրումների նախարար Սուրեն Կարայանն իր ռուսաստանցի պաշտոնակցին՝ ՌԴ արդյունաբերության և առևտրի նախարար Դենիս Մանտուրովին հայկական արտադրության Armphone հեռախոս է նվիրել:
Ռուսական մամուլն անդրադարձել է նախարարական նվերին՝ ներկայացնելով Mobile Research Group ընկերության փորձագետ Էլդար Մուրտազինի տեսակետը: Վերջինը ծաղրել է ռուս պաշտոնյային նվիրած հայկական հեռախոսը:
Ռուսական НСН լրատվական գործակալությանը տված հարցազրույցում փորձագետը նշել է, որ հայկական արտադրանքի անվան տակ ռուս նախարարն իրականում հայկական փաթեթավորմամբ չինական հեռախոս է նվեր ստացել:
«Armphone-ը չինական հեռախոս է, որն ունի հայկական տուփ, հայկական հրահանգներ, հայկական երաժշտություն, բայց ընդհանուր առմամբ այն սովորական չինական հեռախոս է», — ասել է նա՝ հավելելով, որ անգամ Ռուսաստանն այսօր չի կարողանում սեփական սմարթֆոն արտադրել:
«Հայաստանում չկա արտադրություն, չկան ինժեներներ: Եթե Ռուսաստանը չի կարող նման բան արտադրել, ինչպես կարող է ավելի նվազ ռեսուրսներ ունեցող Հայաստանն անել»,- ասել է Մուրտազինը:
Հայկական սմարթֆոններ արտադրող «Թեքնոլոջի ընդ Սայնս Դայնամիքս» ընկերության հիմնադիր տնօրեն Վահան Շաքարյանը ռուսաստանցի փորձագետի քննադատությանն ու ծաղրին լուրջ չի վերաբերվում:
«Մուրտազինին անգամ միջազգային փորձագետներն են անվանում սերիալային բամբասանքների նախարար: Մի մարդ, որն ավարտել է քիմիական ֆակուլտետը և ՏՏ —ի հետ ոչ մի կապ չունի, իրեն համարում է ՏՏ ոլորտի մասնագետ»,- Sputnik Արմենիայի հետ զրույցում, անդրադառնալով ռուսական մամուլին մեկնաբանություն տված փորձագետի անձին, ասաց Շաքարյանը` հայ մասնագետներին ու արտադրողին տրված նրա գնահատականը համարելով նախանձի կան շովինիզմի արտահայտություն:
Ինչ վերաբերում է ռուսական համանման հեռախոսների հետ համեմատությանը, Վահան Շաքարյանը նշեց, որ տարեսկզբին Հայաստան էին ժամանել ռուսական Yota կորպորացիայի ներկայացուցիչ մասնագետները՝ գլխավոր ինժեներ Մաքսիմ Դենիսովի գլխավորությամբ, ուսումնասիրել հայ գործընկերների աշխատանքը:
«Բացի այդ, մենք նրանց հետ նաև պայմանագիր ունենք, որոշ հարցերում մենք նաև օգտակար ենք եղել Yota-ի ձևավորմանը»,- ասաց Շաքարյանը, սակայն չբացեց փակագծերը, քանի որ ռուսական կողմի հետ գաղտնագրության պայմանագիր ունեն:
Վահան Շաքարյանի խոսքով` հայկական սմարթֆոնը գծագրվում և պատրաստվում է Հայաստանում: Բայց քանի որ ո՛չ Հայաստանում, ո՛չ ԱՊՀ-ում չկա տեսախցիկների արտադրություն, դրանք ստիպված են լինում գնել Sony ընկերությունից, ապակիները ներկրում են Հոնկոնգինց, իսկ պլաստմասսե դետալները՝ Չինաստանից:
«Հեռախոսի բաղկացուցիչ մասերն են ուղեղը, չիպը, որն աշխատեցնում է այդ ուղեղը, օպերացիոն համակարգը և մնացածը՝ պլաստմասսե կտորներ, պտուտակներ։ Իսկ թե այդ ուղեղն ինչպես պիտի աշխատի և համագործակցի չիպի հետ՝ ինչպես պիտի նկարի, ինչպես պատասխանի զանգահարելիս, գծագրում են հայ ինժեներները՚,- ասաց Շաքարյանը:
Հայկական սմարթֆոնն աշխատում է Android ծրագրով, որը Վահան Շաքարյանի խոսքով` բաց ծրագիր է, և ցանկացած երկիր, ցանկացած կազմակերպություն կարող է այն վերցնել, կատարել փոփոխություններ՝ համապատասխանեցնելով իր համակարգին:
