ԵՐԵՎԱՆ, 8 դեկտեմբերի — Sputnik. ՏՏ ոլորտի հայ մասնագետների արտադրանքը պետք է «աշխատի» ոչ միայն Հայաստանում, այլև` երկրի սահմաններից դուրս, մասնավորապես` արևմտյան երկրներում, Sputnik Արմենիայի հետ զրույցում ասաց Վլադիմիր Տերնովսկին։
Sputnik Արմենիայի հարցերին պատասխանել են ՄՊՀ հաշվողական մաթեմատիկայի և կիբեռնետիկայի ֆակուլտետի հաշվողական մեթոդիկա ամբիոնի դոցենտ Վլադիմիր Տերնովսկին և Լոմոնոսովի անվան Մոսկվայի օպտիմալ կառավարման ամբիոնի դասախոս Ալեքսանդր Կուլևսկին։
-ՏՏ ոլորտը կարո՞ղ է մղիչ ուժ դառնալ հայկական տնտեսության համար։
Վ.Տ. Կարծում եմ, որ այո, լիովին։ Հեռանկար կա, բայց որպեսզի այդ ամենը զարգանա, կրթվել է պետք։ Այդ գործընթացում պետք է հնարավորին չափ շատ մարդիկ ներգրավված լինեն։ Եթե նրանք չսովորեն և միայն ինքնագործունեությամբ զբաղվեն, ճիշտ չի լինի։ Շատեր հինգերորդ դասարանից վաճառում են իրենց ծրագրերը։ Բայց այդպիսի մարդիկ քիչ են, այդ պատճառով ուսուցում է պետք։ Եթե դասավանդող-ծրագրավորողների ռեսուրսը գործարկվի, ապա այդ ոլորտը մի քանի տարի անց առաջ կգնա։ Իսկ եթե պարզապես ինչ-որ գումարներ ներդրվեն անհայտ տեղերում, գործընթացը կդանդաղի։
Ա.Կ. Այս ոլորտը լավն է նրանով, որ մեծ ու արագ եկամուտ է բերում։ Այդ պատճառով էլ ՏՏ ոլորտը պետք է տնտեսական զարգացման մղող ուժ և էկոնոմիկայի մյուս ճյուղերի զարգացման լոկոմոտիվ դառնա ։
-ԵՏՄ երկրները կարո՞ղ են զարգացնել սեփական ՏՏ ոլորտը, համատեղ նախագծեր մշակել, քանի որ դա մի հսկայական տարածություն է, որի ներուժը պետք է օգտագործել։
Վ.Տ. Ես հետաքրքրվել եմ` արդյո՞ք Հայաստանը սոցիալական սեփական ցանց ունի։ Եթե չկա, ուրեմն պետք էլ չէ։ Եթե խոսենք տնտեսության տեսանկյունից, ապա պետք է ջանալ, որ քո արտադրանքն օգտագործեն, օրինակ, ԱՄՆ-ում, Գերմանիայում։ Բջջային հավելածների 10-ից մեկը եկամուտ է բերում։ Օրինակ` ինչու՞ մինչև հիմա ոչ ոք չի մշակել մի այնպիսի հավելված, որը թույլ կտա քեզ հետաքրքրող տեղեկությունը ստանալ։
Վատ չէր լինի, եթե նորություններն ըստ ցանկության զտող մի հավելված ստեղծվեր։ Իմ կարծիքով, այն փող կբերեր։ Նոր հայեցակարգեր են պետք։ Իսկ ինչ-որ մեկի պոչին կպչելը պարզապես փակուղի է։
