ԵՐԵՎԱՆ, 21 դեկտեմբերի — Sputnik, Լաուրա Սարգսյան. Նախարարների ստորագրած համաձայնագրերի համաձայն` Հայաստանն ու Վրաստանը համագործակցելու են ռազմավարական պլանավորման, ռազմական կրթության, բժշկության ոլորտներում։
Երկկողմ հանդիպման շրջանակում կողմերը շոշափել են նաև ՆԱՏՕ-ի և ՄԱԿ-ի խաղաղապահական առաքելություններում հայ և վրացի զինծառայողների մասնակցությունը։
«Ուրախ եմ, որ մեր զինծառայողները կողք կողքի պայքարում են ահաբեկչության դեմ, սատարում են աշխարհում անվտանգության և կայունության պահպանմանը»,- ասել է Իզորիան` ընդգծելով, որ հայ-վրացական հարաբերություններն ունեն խոր արմատներ։
Վրաստանի պաշտպանության նախարարն առաջարկել է հայ զինծառայողներին հատուկ լեռնային նախապատրաստման դասընթաց անցնել գնդապետ Բեսիկ Կուտատելաձեի անվան Սաչխերի լեռնային պատրաստության դպրոցում։
Հայ զինծառայողները պարբերաբար մասնակցում են ՆԱՏՕ-ի «Գործընկերություն հանուն խաղաղության» ծրագրի շրջանակում Սաչխերի դպրոցի ձմեռային և ամառային միջանկյալ դասընթացներին, որտեղ վրացի հրահանգիչների ղեկավարությամբ յուրացնում են բազային հմտություններ, ուսումնասիրում են ձմեռային լեռնային հատվածներում տեղաշարժման մեթոդները։
Ընդհանուր առմամբ դասընթացը մշակվել է զինվորականների համար` լեռնային պայմաններում և ձյան վրա տեղաշարժվելու տեխնիկան կատարելագործելու նպատակով։
Հայկական կողմը դեռ Վրաստանի նախկին նախարար Թինաթին Խիդաշելիի օրոք առաջարկել էր ՆԱՏՕ-ի և ԵՄ-ի տարբեր խաղաղապահական առաքելությունների ընթացքում վիրավորված զինծառայողների բուժումն անցկացնել Հայաստանի վերականգնողական կենտրոններում։
Հայաստանի պաշտպանության նախարարը Թբիլիսիում է գտնվում պաշտոնական երկօրյա այցով։ Նախատեսված քննարկումներից բացի, Սարգսյանը կայցելի նաև Պաշտպանության ինստիտուցիոնալ վերածնունդի դպրոց (DIB), որը գործում է Վրաստանում շուրջ վեց ամիս։
