ԵՐԵՎԱՆ, հունվարի — Sputnik. Գեղարքունիքի մարզի Մասրիկ 1 տեղանքում առաջին արևային կայան կառուցելու համար մրցույթը նախատեսվում է կազմակերպել այս տարվա մարտին: Էներգետիկայի և բնական պաշարների փոխնախարար Հայկ Հարությունյանի խոսքով՝ եթե ամեն ինչ իր հունով ընթանա, ապա կայանի աշխատանքները կավարտվեն 2018 թվականին:
«Այստեղ կա ավելի քան 40 օտարերկրյա ընկերություն, սակայն չի նշանակում, որ հետաքրքրվողների շրջանակն այսքանով սահմանափակվում է: Շատ ներդրողներ կան, որոնք չկարողացան Հայաստան գալ, բայց մտադրություն ունեն մասնակցել մրցույթին: Ասեմ, որ մրցույթը լինելու սակագնի համար»,- ասաց փոխնախարարը:
Հարությունյանն ավելացրեց, որ չկա աշխարհում մի լուրջ ընկերություն, որի հետ կապ հաստատած չլինեն. բոլորին տեղեկացրել են ներդրումային ծրագրի մասին:
«Մասրիկ 1-ը միայն առաջին ծրագիրն է, ունենք ևս 5 ծրագիր, որոնք, կախված առաջին ծրագրի հաջողությունից, կորոշենք երբ իրագործել ու ինչ ծավալով: Իսկ մրցույթը շատ արդյունավետ միջոց է շուկայում ամենացածր սակագինը ստանալու համար»,-ասաց նա:
Հարությունյանը հավաստիացրեց՝ Հայաստանը վերականգնվող էներգետիկայի համար բարենպաստ պայմաններ է ստեղծել: Պետությունը ներդրել է իր ունեցած ամբողջ գործիքակազմը ոլորտը խրախուսելու համար:
«Ոլորտն ագրեսիվ աճ է ունենալու: Մինչև 150 կվտ կայանների համար մենք ազատելու ենք ձեզ բոլոր տեսակի հարկերից, լիցենզիաներից: Որ տեղադրեք, ձեր ավելցուկը Հայաստանի էլեկտրական ցանցերը կգնի: Օրենքով մենք ունենք 20 տարվա երաշխիք, որ վերականգնող էներգետիկ կայանը ինչքան էլեկտրաէներգիա արտադրի, պետք է այդքանը գնվի: Բացի այդ, սակագինը, որ ֆիքսվում է սկզբում, 20 տարվա ընթացքում պահպանվում է: Ասեմ նաև, որ արևային վահանակների համար ներմուծման հարկեր չկան»,-ասաց փոխնախարարը:
Նա ավելացրեց, որ նշյալ ծրագրերն իրականացնելու համար մեր երկիրը սպասեց այնքան, մինչև արևային տեխնոլոգիաները մրցունակ դարձան սակագնային համակարգում: Նրա խոսքով՝ 2016 թվականին արդեն հնարավոր է դարձել արևային էներգիան զարգացնել առանց սուբսիդիայի:
Ի դեպ, նրա տեղեկացմամբ, ոչ արդյունավետ հին կայանները դուրս են գալու շահագործումից: Օրինակ` եթե խոշոր ներդրողներ չհայտնվեն, շուտով շրջանառությունից դուրս կգա 40-ամյա Հրազդան ջէկ-ը:
