ԵՐԵՎԱՆ, 26 հունվարի-Sputnik. Աշխատանքի և սոցիալական հարցերի նախարար Արտեմ Ասատրյանը նոր մշակված նախագծով առաջարկեց հաստատել ընտանեկան, սոցիալական նպաստի և հրատապ օգնությունների վճարի համար նախատեսված ֆինանսական միջոցների չափերը։
«Հաշվի է առնվում ՀՀ պետական բյուջեով նախատեսված միջոցները` 39,5 միլիարդ դրամ։ Սահմանվող չափերը տարբերակվում են` ելնելով ընտանիքների անապահովության մակարդակից և բնակության վայրից (սահմանամերձ և բարձրլեռնային), ինչպես նաև երեխաների թվից»,- ասաց նախարարը։
Նրա խոսքով` հավելման չափերը սկսվում են 5500 դրամից մինչև 8000 դրամ։ Հաստատելու դեպքում նախարարը վարչապետից մեկ օր ժամանակ խնդրեց փոքրիկ շտկումներ իրականացնելու համար։
Հիշեցնենք, որ ընտանեկան նպաստի բազային մասը 18 հազար դրամ է։ Ըստ դրա` յուրաքանչյուր 18 տարին չլրացած անդամին տրվող հավելումը տատանվում է 5500-6500 դրամի միջև։
Չորս և ավելի` 18 տարին չլրացած անդամ ունեցող ընտանիքների յուրաքանչյուր 18 տարին չլրացած անդամին տրվող հավելումը 6500-7500 դրամ է։
Բարձր լեռնային կամ սահմանամերձ բնակավայրերի ընտանիքների յուրաքանչյուր 18 տարին չլրացած անդամին տրվող հավելումը 6500-7000 դրամ է։
Բարձր լեռնային կամ սահմանամերձ բնակավայրերի բազմազավակ ընտանիքների յուրաքանչյուր 18 տարին չլրացած անդամին տրվող հավելումը 7000-8000 դրամ է։