«Իրավունք». «Ինչու՞ Մոսկվան որոշեց աջակցել Մեղրիի ազատ տնտեսական գոտուն»
Թերթը գրում է, որ վարչապետ Կարեն Կարապետյանի այցը Մոսկվա առաջին հերթին աչքի ընկավ ընդունելության ջերմությամբ։ Դրանով ռուսական կողմը լուրջ մեսիջներ է հղել։
«Առաջին մեսիջը, անշուշտ, հղված էր Հայաստանի ներքին քաղաքական դաշտ, և դրանով ի ցույց դրվեց, թե ՀՀ վարչապետի պաշտոնը զբաղեցնող Կարեն Կարապետյան անձն ինչ կերպ է ընկալվում Մոսկվայում` դրանից բխող մնացյալ հետևություններով։ Սակայն կար նաև երկրորդ մեսիջը, թերևս ավելի գլոբալ և էական։
Ընդ որում, դա արտահայտվեց ոչ միայն ընդունելության ընդգծված ջերմությամբ, այլև` ձեռք բերված պայմանավորվածությունների միջոցով։ Ռուսաստանի մեսիջներից մեկն աշխարհաքաղաքական բնույթի է։ Նկատի ունենք այցի ընթացքում ձեռք բերված այն պայմանավորվածությունը, որ Ռուսաստանն էական մասնակցություն կունենան Մեղրիում, այսինքն` Իրանի սահմանին հիմնվող ազատ տնտեսական գոտում։ Նույն ծրագրով վերջերս Հայաստան կատարած այցի ժամանակ ծանրակշիռ մասնակցություն ունենալու մասին խոսեց Իրանի նախագահ Հասան Ռոհանին»,-գրում է թերթը։
«Չորրորդ իշխանություն». «Սեյրան Օհանյանի անունից բանակցությունները վարում է Սամվել Բաբայանը»
Թերթի տեղեկություններով` այս օրերին Արցախի նախկին պաշտպանության նախարար Սամվել Բաբայանը զբաղված է ՀՀ նախկին պաշտպանության նախարար Սեյրան Օհանյանի լոբբինգով։
«Նա վերջինիս անունից բանակցություններ է վարում կուսակցությունների ղեկավարների ու քաղաքական գործիչների հետ հնարավոր համագործակցության մասին։ Ու թեև Սեյրան Օհանյանը ֆեյսբուքյան իր էջում գրում է, թե շարունակում է քաղաքական խորհրդակցությունները կուսակցությունների, հասարակական կառույցների, հայտնի գործիչների, մտավորականների հետ, ձևավորելով համախոհների թիմ` միաձույլ դաշինք, իրականում` դե ֆակտո, այդ գործառույթներն իր վրա է վերցրել Սամվել Բաբայանը»,-գրում է թերթը։
«Ժողովուրդ». Միքայել Մինասյանը «ջրի երես» է դուրս գալիս
Թերթի տեղեկություններով` Հանրապետական կուսակցության նախընտրական շտաբի ամբողջ կազմը թեև չի որոշվել, բայց քարոզչական մասով հստակությունն ուրվագծվում է։
«Իշխող Հանրապետականի քարոզչության պատասխանատուն լինելու է ՀՀԿ փոխնախագահ Արմեն Աշոտյանը Վատիկանում ՀՀ դեսպան Միքայել Մինասյանի հետ։ Հիշեցնենք, որ 2013 թվականի նախագահի ընտրություններում ևս Միքայել Մինասյանը եղել է ՀՀԿ նախընտրական շտաբում` որպես պետի տեղակալ»,- գրում է թերթը։
«Հայկական ժամանակ». «Իր փողն է դնելու»
Թերթի տեղեկություններով` ՀՀ վարչապետ Կարեն Կարապետյանը մտադիր է իր անձնական միջոցներից ներդրումներ կատարել Գյումրիում։ Այդ ներդրումները կուղղվեն հին փողոցների վերականգնման ծրագրին։
«Ըստ այդ ծրագրի` Գյումրիի նշված հատվածում լինելու են հյուրանոցներ, ռեստորաններ, արհեստանոցներ, և դառնալու է գրավիչ վայր զբոսաշրջիկների համար։ Կարեն Կարապետյանը մտադիր է իր ներդրումներն իրականացնել հրապարակայնորեն, և դրա նպատակը հնարավոր է այլ ներդրողների ներգրավելն է»,- գրում է թերթը։
«Ժամանակ». «Պատժում են»
ՀՀ նախկին վարչապետ Հովիկ Աբրահամյանի` ՀՀԿ շարքերը լքելուց հետո առաջին «հարվածը» ստացան նրա հարազատները։
«Երեկ նրա եղբորորդին` Արմավիրի ոստիկանապետ Արսեն Աբրահամյանն ազատվել է զբաղեցրած պաշտոնից։ Առաջիկայում պաշտոնից կազատվի նրա մաքսապետ փեսան` Վլադիմիր Թամրազյանը»,- գրում է թերթը։
«Ժամանակ»-ին հայտնի է դարձել, որ Բաղրամյան 26-ից ՊԵԿ պետ Վարդան Հարությունյանին հանձնարարվել է պատրաստել «Զվարթնոց» օդանավակայանի մաքսային պետ Վլադիմիր Թամրազյանի` պաշտոնից ազատման դիմումը»,- գրում է թերթը։
